Kásipkerler qyzmetkeriniń jalaqysynan ustalatyn biryńǵaı tólemdi qalaı esepteıdi

ASTANA. QazAqparat - 1 qańtardan bastap aýyl sharýashylyǵy ónimin óndirýshiler úshin, ońaılatylǵan deklaratsııa negizinde arnaýly salyq rejımin qoldanatyn mıkro jáne shaǵyn kásipkerlik sýbektileri bolyp tabylatyn salyq tóleýshiler jalaqydan standartty salyq salýdyń ornyna biryńǵaı tólem tóleı alady, dep habarlaıdy QazAqparat.

Biryńǵaı tólemge: qyzmetkerlerdiń tabysynan jeke tabys salyǵy, mindetti zeınetaqy jarnasy, jumys berýshilerdiń mindetti zeınetaqy jarnasy, áleýmettik aýdarymdar, mindetti áleýmettik medıtsınalyq saqtandyrýǵa jarna men aýdarymdar engiziledi.

2023 jyly biryńǵaı tólem mólsherlemesi - eńbekaqy tóleý qorynyń 20% kóleminde (mólsherlemeni kezeń-kezeńimen ulǵaıtý kózdelgen: 2024j. - 21,5%, 2025j. – 23,8%, 2026j. – 24,8%, 2027j. – 25,8% jáne 2028j. – 26,3%).

Biryńǵaı tólemdi esepteý kezinde áleýmettik tólemder boıynsha belgilengen jeńildikter eskeriledi.

Biryńǵaı tólemniń eseptelgen somasy qoldanylatyn salyq salý rejımine baılanysty 200.00, 910.00 jáne 920.00 nysandy deklaratsııalarda kórsetiledi.

Biryńǵaı tólem aı saıyn «Azamattarǵa arnalǵan úkimet» memlekettik korporatsııasynyń shotyna esepti aıdan keıingi aıdyń 25-kúninen keshiktirilmeı tólenedi.

Ol keıinnen bıýdjetke jáne tıisti qorlarǵa tólemderdi bóledi jáne biryńǵaı tólem tóleýshilerdiń esebin júrgizedi.