Kásipkerler Qytaıǵa bıdaı kebegin tasymaldaı alady
ASTANA. QazAqparat - QR Aýyl sharýashylyǵy vıtse-mınıstri Gúlmıra Isaevanyń aıtýynsha, qazirgi kezde tıisti hattamaǵa qol qoıyldy, dep habarlaıdy QazAqparat tilshisi.
«Hattamaǵa qol qoıylǵannan keıin eki el arasyndaǵy baqylaý beketterine tıisti kýálik túsedi. Sonyń negizinde bıdaı kebegin kórshi elge tasymaldaýǵa bolady. Negizi, qazirdiń ózinde tasymaldaýdy bastaýǵa bolady. Aǵymdaǵy jylda osy sanattaǵy ónimniń kólemi - 60 myń tonna», - dedi vıtse-mınıstr búgin Úkimet úıinde ótken baspasóz máslıhatynda.
Onyń aıtýynsha, qazirgi kezde bıdaı kebegin tasymaldaı alatyn kásiporyndardyń tizimi jasaqtalyp jatyr. Ázirshe, 2 fırma tirkeýge turdy. Aldaǵy ýaqytta olardyń sanyn 6-ǵa deıin jetkizý kózdelip otyr. Osylaısha, bıyl 6 kásiporyn Qytaıǵa bıdaı kebegin eksporttaı alady.
«Atameken» ulttyq kásipkerler palatasy basqarma tóraǵasynyń orynbasary Nurjan Áltaev palata saıtynda tıisti aqparattyń bar ekenin jetkizdi. Budan bólek, áleýmettik jelilerde «Atameken Qytaıǵa eksporttaıdy» degen heshtegpen top ashylǵan. Oǵan da ótinim berýge bolady.
Aıta keteıik, búgingi baspasóz máslıhatynda vıtse-mınıstr Gúlmıra Isaeva qazaqtyń qoı etin Qytaı eline jetkizý kelisimin de jarııalady. Onyń aıtýynsha, osy jyldyń ekinshijartyjyldyǵynda qazaqstandyq kásipkerler qoı etin qytaılyqtarǵa sata alady.
