Kásipkerler qurylys salasyna jeńildetilgen nesıe bólýdi surady

ASTANA. QazAqparat – Elordadaǵy qurylys salasyna jeńildetilgen nesıe bólý kerek bolyp tur. Bul týraly Astana qalasy Kásipkerler palatasynyń dırektory Beısen Jolboldıev aıtty, dep habarlaıdy QazAqparat tilshisi.

«Qurylys salasy úshin syıaqy mólsherlemesi 6 paıyzdan aspaıtyn jeńildetilgen nesıelerdiń bolýy mańyzdy. Sonymen qatar, ekinshi deńgeıdegi bankter qurylys salasyn qarjylandyrýǵa asyqpaı otyr. Osy oraıda olardyń qatań talaptaryna sáıkes keletinder sırek kezdesedi», - dedi B.Jolboldıev qaladaǵy bıznes ókilderiniń Senat depýtattarymen kezdesýi kezinde.

Onyń aıtýynsha, memlekettik nysandardy salý kezinde memlekettiń kepildik bergen kólemniń negizinde nesıe berýge bolady

«Memleket basshysy bıylǵy qyrkúıek aıyndaǵy Joldaýynda Qazaqstanda shaǵyn jáne orta bıznesti qarjylandyrý úshin 42 mıllıard dollarǵa jýyq qarajat jetispeıtinin aıtqan edi. Sonymen qatar Prezıdent bankterde trıllıondaǵan teńge qarjy is júzinde ekonomıkaǵa esh paıdasyn tıgizbeı bosqa jatqanyn eskertti», - dedi Kásipkerler palatasynyń dırektory.

Osy oraıda ol bankter bıznesti qarjylandyrýǵa baǵyt alýy kerek ekenin atap ótti.