Kásipkerler kómir urlady dep aıyptalǵan áıelge 1 mashına otyn túsirip berdi

ASTANA. QazAqparat - Qostanaı oblysynyń kásipkerleri quny ne bári 180 teńge bolatyn 20 keli kómir urlady dep aıyptalǵan áıelge kómek kórsetti, dep habarlaıdy QazAqparat.

«90-jyldardan kásipkerdiń jaǵymsyz ımıdji, ıaǵnı,  dóreki, tez arada baıýdy, aqsha tabýdy oılaıtyn beınesi qalyptasqan. Alaıda, is júzinde qaıyrymdy ári ádepti adamdar da bar. Qarapaıym ǵana mysal, barlyǵyna da quny 180 teńge turatyn 20 keli kómirdi urlaǵany úshin áıeldiń sotty bolǵandyǵy jaıly qoǵamda úlken dúrbeleń týyndatqan oqıǵa belgili. Atalǵan jańalyq jarııa bolyp, onyń tóńireginde dabyra bastalǵan 2-3 saǵattyń ishinde Qostanaı oblysynyń kásipkerleri áıeldiń úıin jylytý úshin bir mashına kómir berip jiberdi», - dedi kásipker Asqar Kereev búgin QR Bas prokýratýrasynda ótken «Rýhanı jańǵyrý» jobalyq keńesiniń birinshi sessııasynda.

Aıta keteıik, qarasha aıynda Uzynkól aýdandyq sotynda ózgeniń múlkin urlady degen aıyppen jergilikti turǵynnyń ústinen qylmystyq is qaralǵan bolatyn. Oǵan Uzynkól aýdandyq aýrýhanasyna qarasty aýyldardyń biriniń medıtsınalyq pýnkti aýmaǵynan 20 keli kómir urlady degen aıyp taǵylǵan edi. Degenmen taraptardyń tatýlasýyna baılanysty kómir urlaǵan áıel jaýapkershilikten bosatylyp, qylmystyq is toqtatyldy.