Kásipkerler qıyndyqqa ushyrasa, qaıdan kómek suraıtynyn biledi -UKP
QOSTANAI. QazAqparat - Qostanaıda «Atameken» ulttyq kásipkerler palatasynyń keńeıtilgen májilisi bolyp ótti. Onyń jumysyna palatanyń tóralqa tóraǵasy Tımýr Qulybaev qatysty, dep habarlaıdy QazAqparat tilshisi.
Elde shaǵyn jáne orta kásipkerlikti qoldaýǵa aıryqsha mańyz berilgen. Memleket tarapynan tıisti qoldaý jasalsa da, atalmysh salany damytýda kezdesetin kedergiler de az emes. Kásipkerler palatasynyń keńeıtilgen májilisi osy taqyrypta ótti.
Jıynda sóz sóılegen T.Qulybaev «Atamekenniń» sońǵy tórt jylda atqarǵan jumystarynyń negizgi kórsetkishterine toqtaldy. Sonyń biri - adam kapıtalyn damytý. Palata basshysynyń aıtýynsha, ótken 4 jylda bıznesti qorǵaý baǵytynda 22 myńnan astam ótinish kelip túsken. Sonyń 40%-y oń sheshimin tapty. Nátıjesinde, kásipkerlerdiń 92 mıllıard teńgeden astam somaǵa baǵalanǵan menshik quqyǵy qorǵaldy.
«Kásipkerler palatasy 20 myńnan astam normatıvtik-quqyqtyq aktilerge jáne zań jobalaryna saraptama júrgizdi. Memlekettik organdar tarapynan Ulttyq kásipkerler palatasy joldaǵan eskertýlermen usynystardyń 73%-y eskerilip, qaraýǵa alyndy. Máselen, Ulttyq palatanyń aralasýymen jańa salyq kodeksi ázirlendi. Onda shaǵyn jáne orta bıznes úshin arnaıy salyq rejımderi jáne qosymsha qun salyǵynyń shegi saqtalǵan. Osy jyldar ishinde aýqymdy jumys atqaryldy. Eń bastysy, bıznes pen bılik arasynda dáneker bola aldyq. Munyń syrtynda kásipkerlerdiń quqyǵyn qorǵaý baǵytynda kóp jumys istelgenin atap ótken jón. Kásipkerler qandaı da bir jaǵdaı týyndasa, qaıda shaǵymdanatynyn biledi»,- dedi Tımýr Qulybaev.
«Atameken» Ulttyq kásipkerler palatasynyń tóralqa tóraǵasy oblystaǵy «Bastaý» jobasy túlekteriniń júzege asyrǵan bıznes-ıdeıalar kórmesimen tanysty. Kórmege jergilikti kásipkerlerdiń kıiz úı jasaıtyn tseh, shubat óndirisi, polımerlik qaldyqtardy óńdeý, bal óndirý, sýshı-rolldarynshyǵarý, restobardyń ashylýy tárizdi tıimdi jobalary qoıyldy.
Aıta keteıik, ótken jyly «Bastaý» jobasy boıynsha 1255 adam qysqamerzimdi kýrstarda oqyp shyqty. Olardyń 264-i óz isin ashty. Endi bıyl oblystyńbarlyq aýdandary men qalalarynda 2268 adamdy oqytý josparlanyp otyr.
