Kásipkerler «QazTransGaz Aımaq» fılıaldaryna shaǵymdanýda
QYZYLORDA. QazAqparat-Qyzylorda oblysy kásipkerler palatasynyń alańynda «Atameken» UKP-nyń Kásipkerlerdiń quqyqtaryn qorǵaý jáne sybaılas jemqorlyqqa qarsy keńesiniń kóshpeli otyrysy ótti, dep habarlady QazAqparat HAA tilshisi oblystyq palataǵa silteme jasap.
Otyrysqa Qazaqstan kásipkerleriniń quqyqtaryn qorǵaý jónindegi ýákil Bolat Palymbetov, Kásipkerlerdiń quqyqtaryn qorǵaý jáne sybaılas jemqorlyqqa qarsy keńes tóraǵasy Qaıyrbek Súleımenov, tıisti sala basshylary men aımaq kásipkerleri qatysty.
Keńeste Qyzylorda jáne Ońtústik Qazaqstan oblystaryndaǵy kásipkerlik nysandaryn gazdandyrý, sondaı-aq bıznes ókilderiniń atalmysh salaǵa qatysty problemalary, mektepke deıingi bilim berý mekemelerin memlekettik tapsyrys aıasynda qarjylandyrý máseleleri talqylandy.
Keńeste ótkir talqylanǵan máselelerdiń biri - «QazTransGaz Aımaq» AQ-nyń Qyzylorda jáne Ońtústik Qazaqstan óndiristik fılıaldarynyń jumysyna qatysty boldy.
Atap aıtqanda, buǵan deıin, gaz salasynda jobalaý jáne qurylys-montajdaý jumystarymen aınalysatyn birqatar mekeme Qyzylorda oblysynyń kásipkerler palatasyna «QazTransGaz Aımaq» AQ-nyń Qyzylorda Óndiristik fılıaly óziniń monopolııalyq jaǵdaıyn paıdalanyp, kásipkerlik qyzmet túrlerimen aınalysatyn ózge tulǵalarǵa kedergi jasaıtyndyǵyna shaǵymdanǵan bolatyn.
Mundaı másele Ońtústik Qazaqstan oblysyna da tán bolyp shyqty. Bul jóninde Keńes otyrysynda Ońtústik Qazaqstan oblystyq kásipkerler palatasy dırektorynyń orynbasary Ǵazızbek Nátbaev pen shymkenttik kásipkerler de aıtty.
Otyrysta qyzylordalyq bıznes ókilderi Kásipkerler palatasynyń aralasýymen atalmysh másele birneshe ret talqylanyp, ortaq kelisimge kelgendikterin jetkizdi.
Al respýblıkalyq keńes músheleri atalmysh túıitkilge qatysty bitimgershilik komıssııa quryp, jan-jaqty zerttep, shilde aıynda ótkiziletin Keńestiń kelesi otyrysyna shyǵarý týraly sheshim qabyldady.
