Kásipkerler bombadan jasyrynatyn orynǵa kókónis ósirmek
ASTANA. QazAqparat - Brıtanııalyq Zero Carbon Food kompanııasynyń negizin qalaǵan kásipkerler Rıchard Ballarf pen Stıven Drıng kókónis ósirý úshin bombadan jasyrynatyn oryndy jalǵa aldy. London ortalyǵyndaǵy jerdiń astynda ornalasqan bul oryn ekinshi dúnıejúzilik soǵys kezinde qoldanylǵan, dep jazady Rosbalt.
Kásipkerler ıesiz jatqan jerge gıdroponıkanyń kómegimen kókónis ósirýdi josparlap otyr. Atalǵan ónimniń synama túri aspazshylar men synshylar tarapynan joǵary baǵaǵa ıe bolyp, jergilikti meıramhanalarǵa tarap ketti.
Kommertsııalyq maqsatta alǵashqy tuqymdy aldaǵy naýryz aıynda otyrǵyzý kózdelýde. Al jazdyń basynda meıramhanalar men dúkender qymyzdyq, nasybaıgúl, kınza, jasyl burshaq, shalǵam, sarymsaq jáne taǵy basqa kókónisterdi ala alady. Sondaı-aq qyzanaq pen sańyraýqulaq ta ósiriletin bolady.
Kásipkerler nege bul oryndy tańdady degenge kelsek, onda temperatýra men ylǵaldy birkelki saqtaý ońaı bolmaq. Sondaı-aq basqa jylyjaıdaǵydaı kommýnaldyq shyǵyndardy kóp talap etpeıdi, tek energııa únemdeıtin lampa ornatsa jetkilikti deıdi kásipkerler.
