Kásipkerler bir-birin nege «laqtyrady»
ASTANA. QazAqparat - Búginde «Atameken» palatasyna túsetin aryzdardyń ishinde kásipkerler arasyndaǵy daýlarǵa qatysty shaǵymdar az emes. Olar bir-birine aqsha tólemeıdi. Tipti, seriktestik kelisimin rásimdese de, alaıaqtyq jolmen áriptestiń múlkin urlaý faktileri de bar, dep xabarlaıdy QazAqparat tilshisi.
QR Joǵarǵy sotynyń sýdıasy Aqyltaı Qasymovtyń aıtýynsha, bıznes áriptester kóp jaǵdaıda kelisim sharttaryna jaýapsyz qaraıdy. Al, eń bastysy, sol qujattyń árbir bólimi men tarmaǵy jan-jaqty qaralmaıdy. Negizgi máseleler ústirt jazylady. Sonyń nátıjesinde ekeýiniń bireýi óz mindetinen jaltaryp ketedi. Artynan sotta da onyń kinásin dáleldeý qıyn.
«Negizi, álemdik tájirıbe boıynsha kez kelgen kompanııanyń zań bólimi kelisimniń árbir tarmaǵyn zerttep, búge-shúgesine deıin qarap shyǵady. Ondaı kelisim boıynsha sotta sheshim shyǵarý da jeńil. Sebebi bári anyq jazylǵan. Kináli jaqty anyqtaısyń da, úkimdi shyǵarasyń. Biraq bul jerde alaıaqtyq áreketti anyqtaý qıyn. Ondaı áreket úshin qylmystyq jaza qarastyrylǵan. Máselen, bıznesmenniń áriptesi aqshasyn alyp, kelisimdi oryndamaı, ol aqshany basqa jerge jiberse, onda bul alaıaqtyqqa jatady. Degenmen, ony dádeldeý kerek. Al seriktes aqshany alǵannan keıin qarjy daǵdarysy nemese basqa da jaǵdaılar bolyp qalady. Sonda ol alǵan aqshasyn kóbeıtý úshin basqa bireýmen kelisimge otyrýy múmkin. Osy kezde birinshisi ony sotqa beredi. Biraq ondaı isterdi azamattyq jolmen qaraǵan durys sııaqty», - deıdi A.Qasymov.
Sarapshy mamandardyń sózine qaraǵanda, otandyq kásipkerler arasynda quqyqtyq nıgılızm áli de bar. Sonyń saldarynan kelisimsharttar durys jasalmaıdy. Al bıznesmenderdiń ózderi osy máselege atústi qaraıdy. Osyǵan baılanysty «Atameken» UKP arnaıy bazany iske qosýdy josparlap otyr. Ol jerde barlyq kelisimsharttardyń úlgisin tabýǵa bolady. Basqarma tóraǵasynyń orynbasary Rýstam Júrsinovtyń aıtýynsha, atalǵan baza kelesi aptada iske qosylady. «Saıttyń ataýy - «Kelisimsharttardyń konstrýktory». Ol jerde 500-den astam kelisimsharttyń úlgisi bolady. Shaǵyn jáne orta bıznestiń ókilderi kez kelgen qujattyń úlgisin tegin júkteı alady. Oǵan qosa, kelisimshartty óz yńǵaıyńa qaraı jasap alýǵa múmkindik bar. Іshinde ınstrýktsııalar da bolady», - dep atap kórsetti R.Júrsinov Sybaılas jemqorlyqqa qarsy kúres keńesiniń búgingi otyrysynda.
Al Qazaqstan kásipkerleriniń quqyqtaryn qorǵaý jónindegi ýákil Bolat Palymbetovtyń sózine qaraǵanda, kásipkerlerdiń kelisimshart mindetterin oryndaı almaýyna memlekettik organdar da kináli. Olar aqshany ýaqytynda bermeıdi. Sodan bıznesmender óz áriptesterine aqshany tóleı almaı júredi.
«Máselen, bıznesmen tenderdi utyp alady. Al memlekettik organ oǵan aqshany tólemeı qoıdy. Sodan búkil tizbek kete beredi. Kásipker óz áriptesine aqsha bere almaıdy. Solaı ary qaraı ketedi», - deıdi B.Palymbetov.
Osy oraıda basqarma tórǵasynyń orynbasary R.Júrsinov mańyzdy bir máseleni eske saldy.
«Bizde memlekettik organdardyń birinshi basshysy aýyssa, birden barlyq kelisimsharttar joıylady. Ákim, mınıstr bolsyn, kelisimsharttardy lezde buza salady. Óte qyzyqty úrdis...», - deıdi R.Júrsinov.
