Kásipkerler arasynda jer máselesi ýshyǵyp tur - Atameken
ASTANA. QazAqparat - Jergilikti bılik buryn berilgen jer telimderin keri qaıtaryp jatyr. Al bir jer telimi boıynsha birneshe kásipkerge ruqsat qaǵazdarynyń qalaısha berilgenin eshkim bilmeıdi, dep xabarlaıdy QazAqparat tilshisi.
«Atameken» UKP basqarma tóraǵasynyń orynbasary Rýstam Júrsinovtyń aıtýynsha, jaqyn arada sottarǵa jer qatysty daýlar kóptep túse bastaıdy. Ondaı daýlardyń deni - kásipkerlerden jerdi zańsyz tartyp alý jaǵdaılary.
«Bizdiń esebimizge sáıkes, qazirgi kezde jerge qatysty daý-damaıdardyń sany 2 593-ke jetti. Aqmola oblysynda ondaı daýlar 400-den asyp jyǵylady. Máseleniń máni mynada, kodeks boıynsha jer telimderi tek aýktsıon arqyly ǵana beriledi. Al ákimdikterdiń kóbi uzaq ýaqyt boıy jerdi aýktsıonsyz berip keldi. Endi, ol jerlerdi qaıtaryp jatyr. 3-4 jyl ótti. Kásipkerler jerdi ıgerdi, biraz aqshasyn da saldy. Búginde dál osy másele ýshyǵyp tur. Biz ony sezip otyrmyz», - dedi R.Júrsinov «Atameken» UKP Sybaılas jemqorlyqqa qarsy kúres jónindegi keńestiń búgingi otyrysynda.
QR Joǵarǵy sotynyń sýdıasy Aqyltaı Qasymovtyń sózine qaraǵanda, qazirdiń ózinde sottarǵa jerge qatysty aryz-shaǵymdar kóptep túsip jatyr.
«Sosyn osy rette bir qıyndyq týyndap tur. Bir jerge birneshe kásipkerdiń quqyǵy bar eken. Ol qujattar qalaı berildi? On qolmen berildi me? Sol qolmen berildi me? Osyny anyqtaý qıyn. Árıne, biz jerge kimniń jáne qansha aqsha salǵanyna qaraımyz. Sol jerde kópten beri istep jatyr ma? Soǵan mán beremiz», - dep atap kórsetti A.Qasymov.
Aıta keteıik, keńestiń búgingi otyrysynda kásipkerler arasyndaǵy kelisimsharttardy oryndaý máselesi qaraldy. Búginde «Atameken» palatasyna túsetin aryzdardyń ishinde bıznesmender arasyndaǵy daýlarǵa qatysty shaǵymdar az emes. Olar bir-birine aqsha tólemeıdi. Tipti, seriktestik kelisimin rásimdese de, alaıaqtyq jolmen áriptestiń múlkin urlaý faktileri de bar.
Qazaqstan kásipkerleriniń quqyqtaryn qorǵaý jónindegi ýákil Bolat Palymbetovtyń sózine qaraǵanda, kásipkerlerdiń kelisimshart mindetterin oryndaı almaýyna memlekettik organdar da kináli. Olar aqshany ýaqytynda bermeıdi. Sodan bıznesmender óz áriptesterine aqshany tóleı almaı júredi.
«Máselen, bıznesmen tenderdi utyp alady. Al memlekettik organ oǵan aqshany tólemeı qoıdy. Sodan búkil tizbek kete beredi. Kásipker óz áriptesine aqsha bere almaıdy. Solaı ary qaraı ketedi», - deıdi B.Palymbetov.
Osy oraıda R.Júrsinov mańyzdy bir máseleni eske saldy.
«Bizde memlekettik organdardyń birinshi basshysy aýyssa, birden barlyq kelisimsharttar joıylady. Ákim, mınıstr bolsyn, kelisimsharttardy birden buza salady. Óte qyzyqty úrdis...», - deıdi R.Júrsinov.
