Kásipkerge kedergi keltirgeni úshin qylmystyq bap is júzinde jumys istemeıdi - Rýstam Júrsinov

NUR-SULTAN. QazAqparat – Zańdy kásipkerlik qyzmetke kedergi keltirgeni úshin jaýapkershilikke tartýdyń qylmystyq baby is júzinde jumys istemeı tur. Bul týraly Qazaqstan Respýblıkasy kásipkerleriniń quqyqtaryn qorǵaý jónindegi ýákili Rýstam Júrsinov málim etti, dep habarlaıdy QazAqparat tilshisi.

«Bızneske aýqymdy shyǵyn keltirgeni úshin memlekettik qyzmetshiler ózderiniń qatelikterine is júzinde eshqandaı jaýapkershilikti almaıdy. Statıstıkaǵa qaraǵanda, qylmystyq ári ákimshilik yqpal etý sharalary óte sırek qoldanylady», - dedi R. Júrsinov Qazaqstanda shaǵyn jáne orta kásipkerlikti damytý salasyndaǵy memlekettik saıasatty jáne quqyqtyq retteýdi jetildirý taqyrybyndaǵy Parlamenttik tyńdaýda.

Onyń aıtýynsha, zańdy kásipkerlik qyzmetke kedergi jasaǵany úshin qylmystyq jaýapkershilik (365-bap) eskerilgen.

«Tájirıbe júzinde ol jumys istemeı tur. Sońǵy 3 jylda 1 adam sottalǵan», - dep naqtylady ýákil.

Taratylǵan málimetterge qaraǵanda, 2016 jyly 365-bap boıynsha jeti quqyq buzýshylyq boıynsha qylmystyq is qaraýda bolǵan, beseýi sotqa joldanyp, 3 adam sottaldy. 2017 jyly bes quqyq buzýshylyq boıynsha is qaralyp, bir adam sotty boldy. 2018 jyly osyndaı statıstıka tirkelmese, 2019 jyly úsh quqyq buzýshylyqqa qatysty is qaralyp, sotqa bireýi joldandy.