Kásipkerdiń jumys júrgizýine kedergi keltirgen ákimdik jaýapkershilikke tartyldy - Qyzylorda
Kásipkerdiń jumysyn júrgizýge memlekettik organ kedergi jasaǵan. Osy jyldyń maýsym aıynda «Azret-jol qurylys» JShS-i Jańaqorǵan kentiniń ortalyǵynda eki kósheni ortasha jóndeýden ótkizýge tapsyrys alady.
Tapsyrys berýshiler kelisimshartqa sáıkes jumysty 1 aıdyń ishinde bitirýdi talap etedi. Talap kásipker tarapynan tolyq oryndalyp, merziminde bitkenine, tehnıkalyq qadaǵalaýshylardyń jasalǵan jumysqa oń baǵa bergenine qaramastan, tapsyrys berýshi Jańaqorǵan kenti ákimdigi qabyldaý aktisine qol qoıýǵa asyqpaıdy.
Negizi memlekettik satyp alý salasyndaǵy zańdylyqtarǵa sáıkes, jumys tolyq bitkennen keıin tapsyrys berýshi 3 jumys kúninen keshiktirmeı aktilep, qabyldap alýy tıis. Al bul jumystardy Jańaqorǵan kenti ákimdigi bir kóshege qatysty tapsyrysynyń aktisine 14 tamyzda, ekinshi kóshe boıynsha 6 qyrkúıekte qol qoıǵan.
Munymen qosa, kásipkerdiń ózin jumysty merziminde bitirmedi degen jeleýmen 1 mln 353 myń 520 teńge turaqsyzdyq aıybyn óndirip, josyqsyz retinde taný úshin sotqa beredi.
«Azret-jol qurylys» JShS-niń quqyǵyn qorǵaý týraly Kásipkerler palatasyna túsken ótinishten keıin zańgerler máseleni jan-jaqty qarastyrdy. Sebebi, eger sotta kásipker josyqsyz retinde tanylatyn bolsa 2 jyl kóleminde jumys jasaı almaıdy. Bul degenińiz bıznestiń jabylýyna da alyp kelýi múmkin.
Máseleni zerdeleý barysynda zańgerler tapsyrys berýshiniń qoıyp otyrǵan talaptarynyń negizsiz ekendigin anyqtaı aldy. ıAǵnı memlekettik satyp alý salasyndaǵy zańnamalyq aktilerge sáıkes jumysty oryndaý merzimi kelisimsharttyń qazynashylyq organdarynda tirkelgen ýaqytynan bastap eseptelýi qajet, al Jańaqorǵan kenti ákimdigi bul jaıtty eskermeı, kelisimshartqa qol qoıǵan kúnnen bastap eseptegen.
Sonymen qatar, Zań boıynsha tapsyrys berýshi kelisimshartty tıisti oryndamaǵany belgili bolǵan sátten bastap 30 kún ishinde sotqa áleýetti ónim berýshini memlekettik satyp alýǵa josyqsyz qatysýshy dep taný týraly talap qoıýǵa mindetti. Osy merzimder tyıym salynatyn merzimder bolyp tabylady, bul merzimderdiń ótýi áleýetti ónim berýshini memlekettik satyp alýǵa josyqsyz qatysýshy dep taný týraly aryzdy qanaǵattandyrýdan bas tartý úshin negiz bolyp tabylady.
Alaıda, Jańaqorǵan kenti ákimdigi Zańda kórsetilgen merzimderdi de ótkizip alǵan.
Atalmysh máselege qatysty Kásipkerler palatasynyń zańgeri Aıda Qaıýpova: «Biz sotta osy dáleldemelerdi alǵa tartyp, Jańaqorǵan kenti ákimdigi talabynyń negizsizdigin dáleldeı aldyq. Nátıjesinde tapsyrys berýshiniń josyqsyz dep taný týraly talaby qanaǵattandyrylmady. Kásipker bıznesimen qatar 1 mln teńgesin saqtap qala aldy. Munan ózge, oblystyq mamandandyrylǵan aýdanaralyq ekonomıkalyq soty zań talaptaryn tıisinshe oryndamaǵany úshin Jańaqorǵan kenti ákimdigin jaýapkershilikke tartý jóninde jeke uıǵarym shyǵardy», - deıdi.
Aıta ketý kerek, 2017 jyly kásipkerler palatasyna bıznes ókilderinen 200-den asa ótinish tústi. Júrgizilgen jumystardyń nátıjesinde 350-den asa kásipkerdiń quqyǵy qorǵalyp, 370 mln teńge qarjysyn saqtap qala aldy.