Kásipkerdiń úıine qarýly qaraqshylyq jasaǵan úsh ózbekstandyq qolǵa tústi
ALMATY. 28 qyrkúıek. QazAqparat /Erbol Azanbek/ - Almatylyq kásipkerdiń úıine qaraqshylyq shabýyl jasaǵan Ózbekstannan kelgen úsh adam ustaldy.
Eske sala ketsek, osydan eki apta buryn Alataý aýdanynda turatyn kásipkerdiń úıine shabýyl jasalǵan edi. Tańǵy saǵat tórtte úıge basa-kóktep kirgen belgisiz úsheý úı ıesi men onyń jubaıyn baılap tastap, 120 myń teńge men eki uıaly telefondy alyp, oqıǵa ornynan taıyp turǵan.
«Azamat A-nyń tabysty bıznesi týraly habardar bolǵan olar onyń úıine qaraqshylyq shabýyl jasaýdy josparlaǵan. Qaraqshylar úı ıesin qatygezdikpen soqqyǵa jyqqan. Abyroı bolǵanda, bul kezde balalar týystarynyń úıinde qonaqta bolǵan eken. Úı ıesi jıǵan-tergenderin úıde saqtamaıtyndyǵynan qara nıettiler múldem beıhabar edi. Tek jarty saǵattan keıin ǵana jipten bosaǵan úı ıeleri bul shabýyl týraly dereý polıtsııaǵa habarlaǵan. Alaıda, kásipker men onyń jubaıy úshin shabýyl jasaǵandardyń túr-túsi de, sonymen birge «shaqyrylmaǵan qonaqtardyń» kólikpen nemese jaıaý kelgenderi de beımálim boldy»,- deıdi Almaty qalasy ІІD Krımınaldy polıtsııa basqarmasynyń qaraqshylyq shabýyl jáne tonaý qylmystaryn ashý jónindegi bóliminiń bastyǵy, polıtsııa maıory Janbolat Zııaddın.
Jedel-izdestirý nátıjesinde Ózbekstannyń Núkis qalasynda týyp-ósken úsh adam anyqtaldy. Qazirgi kezge deıin qaraqshylar Almaty qalasynyń ártúrli aýdandarynda turyp kelgen. Sońǵy ýaqytta «Shańyraq» yqshamaýdanyndaǵy jer úıdi olar ózderiniń baspanasy retinde paıdalanǵan.
«Shabýyl jasaýshylardyń ekeýi 25 jasta, al olardyń taǵy bir sybaılasy - 26-da. Olardyń bireýi buryn toppen kisi tonaǵany úshin qylmystyq jaýapkershilikke tartylǵan bolyp shyqty. Qylmyskerler qazir ýaqytsha oqshaýlaý ızolıatorynda. Qazirgi kezde ustalǵandardyń basqa da qylmystarǵa qatystylyǵy tekserilýde»,- deıdi J.Zııaddın.
