Kásipkerdiń bir mıllıon teńgesi qaraqshylardyń oljasyna aınalyp kete jazdady
ALMATY. Naýryzdyń 3-i. QazAqparat / Ádilet Musahaev / - Almatyda naýryzdyń 2-si kúni 47 jastaǵy jeke kásipker qaraqshylyq shabýylǵa ushyrap, bir mıllıon teńgesinen aıyrylyp qala jazdady,
dep habarlaıdy QazAqparat ІІB baspasóz qyzmetine silteme jasap.
Úıge barar jolda qarańǵylaý buryshtan kútip alǵan belgisiz úsheý oǵan shabýyl jasap, armatýramen uryp jyǵyp, aqshasyn tartyp áketken.
«Jábirlenýshi basynan aýyr zaqym alǵan, degenimen shabýyl jasaýshylardyń túr-tulǵasyn baıqap qalyp, polıtsııaǵa habar bergen. «Boran-020» sholǵynshy ekıpajy qylmyskerlerdi shuǵyl izdestirýge kirisip, olardyń biriniń izine túsken. Ustalǵan adamnan urlanǵan aqsha men qylmystyń aıǵaǵy - armatýra temiri tabylǵan», deıdi Almaty qalasy ІІB sholǵynshy polıtsııa komandıri Telman Qambarov.
Qylmysty uıymdastyrýshy Almatyǵa jumys isteýge kelgen Ońtústik Qazaqstan oblysynyń 24 jasar turǵyny bolyp shyqqan.
«Qylmyskerdiń sybaılastary jasyrynyp qalǵan, biraqta olardyń aty-jóni anyqtaldy. Bul toptyń basqa da qylmysqa qatysy bar bolýy múmkin», deıdi T.Qambarov
