Kásipkerdi 74 mln teńge shyǵynǵa batyrǵan qylmystyq top qolǵa tústi
ASTANA. QazAqparat - Almatyda kásipkerden qoqan-loqy kórsetip, aqshasyn tartyp alyp kelgen qylmystyq top qolǵa tústi, dep habarlaıdy QR ІІM baspasóz qyzmeti.
«Bıyl qyrkúıekte Almaty qalasynda fıbrobeton daıyndaýmen jáne qas betterdi jasaýmen aınalysatyn JShS dırektory ózi biletin bir top adam 2016 jylǵy sáýirden beri kúsh kórsetip, atys qarýymen qoqan-loqy jasap, onyń 16 mln teńge aqshalaı qarajatyn ıelengeni, oǵan tıesili páterdi basqa bireýdiń atyna resimdeýge jáne 62 mln teńge qaryz alǵan degen zańsyz shart jasaýǵa májbúrlegeni týraly Іshki ister departamentine aryzdanǵan» delingen habarlamada
Ótinish boıynsha asa iri mólsherde qorqytyp alý baby (QR QK-niń 194-babynyń 4-bóligi) boıynsha qylmystyq is qozǵalǵan.
ІІM joldaǵan málimet boıynsha, polıtsııa qyzmetkerleri kúdiktilerdi qylmys ústinde ustaýǵa baǵyttalǵan jedel-izdestirý is-sharalary keshenin júrgizgen,
«Aǵymdaǵy jyly 28 qazanda uıymdasqan qylmysqa qarsy kúres bólinisteriniń qyzmetkerleri Astana qalasynda jábirlenýshiden 3 300 000 teńge aqsha alý kezinde Astana jáne Almaty qalalarynyń 26 jáne 47 jastaǵy turǵyndaryn ustady. Avtomashınany tekserý kezinde kúdiktilerdiń birinen qylmys quraly - tirkelmegen pnevmatıkalyq tapansha alyndy» delingen habarlamada.
Sondaı-aq, Almaty qalasynda úshinshi kúdikti - 29 jastaǵy Almaty oblysynyń turǵyny ustaldy. Ustalǵandar QR QPK-niń 128-baby boıynsha Almaty qalasy ІІD-niń ýaqytsha ustaý ızolıatoryna qamaldy. Qazirgi ýaqytta dáleldeý bazasyn bekitý boıynsha jedel-tergeý is-sharalary júrgizilýde.
