Kásipkerden 5 mln teńge bopsalaǵan gazettiń bas redaktory qamaýǵa alyndy
ShYMKENT. QazAqparat - Ońtústik Qazaqstan oblysynda gazettiń bas redaktory kásipkerden 5 mln teńge bopsalamaq bolǵan. Ózin Memlekettik kiris depatramentine qarasty ekonomıkalyq tereý bóliminiń qyzmetkerimin dep tanystyrǵan jýrnalıst kásipkerge qamqorlyq jasaımyn dep aqsha talap etken, dep habarlaıdy QazAqparat HAA tilshisi.
Oblystyq Memlekettik kiris departamentiniń baspasóz qyzmetiniń málimetinshe, gazettiń bas redaktory oblystyq prokýratýranyń janynda kásipkerden 100 myń teńgesin alyp jatqan jerinen ustalǵan.
«Bıylǵy jyldyń 17-shi shildesi kúni Ońtústik Qazaqstan oblystyq Memlekettik kirister departamentiniń ishki qyzmet basqarmasynyń ókilderi oblystyq ІІD uıymdasqan qylmysqa qarsy kúres basqarmasymen birlese otyryp, Mýkovnıkov D. A degen azamattan 100 myń teńge alyp jatqan jerinen Ómiralıev Ǵanı Bekkojaevıchti ustady. Ol «Qoǵamdyq baqylaý» gazetiniń bas redaktory bola tura ózin Memlekettik kiris departamentine qarasty ekonomıkalyq tereý bóliminiń qyzmetkerimin dep tanystyrǵan. Tintý kezinde onyń qaltasynan 100 myń teńge men óńirlik Memlekettik kiris departamenti qyzmetkeri degen jalǵan kýálik tabyldy» delingen baspasóz málimdemesinde.
Jýrnalıst alaıaqtyq áreket jasaý maqsatynda Mýkovnıkovke oıyn bıznesine qamqorlyq jasaımyn dep, odan bas-aıaǵy 5 mln teńge talap etken. Qazirgi tańda 1983 jyly týǵan azettiń bas redaktory Oblystyq ІІB ýaqytsha tereý abaqtysyna qamaýǵa alyndy. Onyń ústinen Qylmystyq protsesýaldyq kodekstiń 128-shi babymen is qozǵalyp, tergeý amaldary júrgizilýde.
Aıta keteıik, bul óńirde jýrnalıstiń bopsalaý deregi boıynsha ustalǵan birinshi oqıǵa emes. Buǵan deıin respýblıkalyq «Ádilet» gazetiniń bas redaktory Qýanysh Botabekov halyqtan qyrýar qarajat bopsalady dep aıyptalyp, 7 jyl 6 aıǵa sottalǵan bolatyn. Ol qazir jazasyn qatań rejımdegi kolonııada óteýde.
