Kásipkerden 43 mln teńge bopsalaǵan aqtóbelik ustaldy
AQTÓBE. QazAqparat - Aqtóbede kásipkerdi uryp-soǵyp 43,5 mıllıon teńge aqshasyn alǵan 32 jastaǵy jigit ustaldy, dep habarlaıdy QazAqparat tilshisi.
Aqtóbe oblystyq Polıtsııa departamentiniń krımınalısteri jedel izdestirý sharasy barysynda 32 jastaǵy aqtóbelikti qolǵa túsirdi.
«Kúdikti 2018 jyldan bastap halyqaralyq izdeýde boldy. Qorqytyp, uryp-soǵyp óz sybaılastarymen birge kásipkerden 43,5 mıllıon teńge alǵan», - dep habarlady oblystyq PD baspasóz qyzmetshisi Erbolat Sarqulov.
Málim bolǵandaı, ol buǵan deıin de urlyq, qaraqshylyq jáne buzaqylyq úshin birneshe ret isti bolǵan.
Qazir qylmystyq oqıǵaǵa qatysty tergeý aıaqtalyp, is sotqa jiberildi.
