Kásipker Ulytaýda erkin ekonomıkalyq aımaq qurýdy usyndy
«Men jańadan qurylǵan 3 oblysqa bir-bir usynys jasar edim. Bir oblysymyzdy Bilim oblysy qylyp, álemniń ozyq ýnıversıtetterin osy jerge ashsaq. Ekinshi bir oblysymyzdy Densaýlyq oblysy qylyp, úzdik aýrýhanaldy ákep sonda ornatsaq. Qazir bilesizder kóptegen qazaqstandyqtar muqtajdyqtan shetelge baryp emdelýde», - dedi quryltaı múshesi.
Sondaı-aq ol Ulytaýda shaǵyn jáne orta óndiristi damytýdy usyndy.
«Úshinshiden, osy Ulytaý oblysyndaǵy bir aýdandy nemese bir qalany ekonomıkalyq erkin aýmaqqa aınaldyrsaq. Ony 2025 jylǵa deıin salyqtan bosatyp, kásipkerlerdi jappaı osynda shaqyryp, kishi jáne orta óndiristerdi kóbeıtsek dep oılaımyn», - dedi kásipker.
Aıta keteıik, Prezıdent Ulytaý oblysyndaǵy jumys sapary aıasynda Ulttyq quryltaıdyń alǵashqy otyrysyna qatysyp jatyr.
Keshe Memleket basshysynyń Ulttyq quryltaı qurý týraly Jarlyǵy jarııalandy.
Ulttyq quryltaıdyń qazirgi quramynda Májilis depýtattary men QHA múshelerinen, azamattyq qoǵam men saıası partııa ókilderinen, sarapshylar men óńirlerdegi qoǵamdyq keńes múshelerinen, kásipkerlerden jasaqtalǵan 117 adam bar.
Solardyń bir parasyn atasaq, aqyn Muhtar Shahanov, qazaqtyń tuńǵysh ǵaryshkeri Toqtar Áýbákirov, akademık Asqar Jumadildaev, ekonomıst Jaqsybek Kúlekeev, saıasatker Álıhan Báımenov, jýrnalıst, medıa-menedjer, qoǵam qaıratkeri Ermurat Bápı, Parlamenttiń birneshe shaqyrylymynyń depýtaty Nurtaı Sabılıanov, balýan Dáýlet Turlyhanov, ǵalym-bıotehnolog Kúnsulý Zakarııa, dintanýshy Qaırat Joldybaı, ǵalym Anar Fazyljanova sııaqty esimder bar.
Memlekettik keńesshi Erlan Qarınniń jazbasyna súıensek, keleshekte quryltaı jumysyna qatysýshylar aýystyrylyp otyrýy múmkin.
