Kásipker otbasyna qaraqshylyq shabýyl jasaǵandar ustaldy
ORAL. QazAqparat - Ótken jyldyń 28 jeltoqsanynda betperde kıgen belgisiz ekeý Zelenov aýdany Ozernoe aýylynda turatyn, Oral qalasynda sút ónimderin satýmen aınalysatyn kásipker zeınetkerler Tájibaevtar úıine basyp kirgen edi.
BQO ishki ister departamentiniń baspasóz qyzmetinen túsken málimetke qaraǵanda, sol kúni sharýa qojalyǵynyń basshysy, 1943 jylǵy Bektemis Tájibaev qalaǵa sút satýǵa ketken de, úıde zaıyby, 1948 jylǵy Olga Tájibaeva qalǵan. Qaraqshylar zeınetkerdi pyshaqpen qorqytyp, skotchpen baılap, seıften 500 myń teńgeni alǵan da, tabandaryn jaltyratqan.
Sodan beri kúdiktilerdi izdestirý jumystary júrgizilip, olar 2 sáýir kúni qolǵa tústi. Onyń biri kórshiles Darııan aýylynda turatyn 1966 jylǵy G. zeınetkerlerdiń alys týysy bolyp shyqty, aǵaıyndarynyń nemen aınalysatynyn jaqsy biletin ol paıdakúnemdik maqsatpen qylmysty uıymdastyrǵan. Ekinshi kúdikti, 1984 jylǵy Oral qalasynyń turǵyny tehnıkalyq qyzmet kórsetý stansalarynyń birinde jumys isteıdi eken. Oqıǵa ornynan olardy biriniń baýyry avtokólikpen qalaǵa jetkizip, «oljalaryn» bólisken.
