Kásipker múmkindigi shekteýli 15 jandy jumyspen qamtyp otyr

QYZYLORDA. QazAqparat - Qyzylordalyq tiginshi múmkindigi shekteýli 15 adamdy jumyspen qamtyp otyr, dep habarlady QazAqparat HAA tilshisi qalalyq ákimdikke silteme jasap.

Buǵan deıin úı ishinde azyn-aýlaq tapsyrys alyp kelgen Orynkúl Orazbaeva endi tigin kólemin edáýir ulǵaıtty.

«Damý» qory arqyly tómen paıyzdy nesıe alǵan ismer áıel tolyqqandy jabdyqtalǵan tseh ashty. Ózi izdenip júrip sańyraýlar qoǵamynan qolynan is keletin qyz-kelinshekterdi iriktep alǵan. Qazir ujym balabaqshalarǵa tósek jabdyqtaryn ázirlep jatyr. Jaqyn kúnderi arnaıy kıimder men mektep formalaryn tigýge kirisedi. Memlekettik baǵdarlama arqyly kásibin keńeıtken kásipker aldaǵy ýaqytta jańa jumys oryndaryn ashýdy kózdep otyr.

«Tigýdi jaqsy meńgergen, jumysqa óte yntaly, bári qýanyshty. Otbasylary bar, 4-5 balalary bar báriniń, balalaryna kıim, tamaq kerek. Qatardan qalmaı, ómir súrýi tıis. Men múgedekpin dep otyrýǵa bolmaıdy. Jumys isteý kerek. Osylarǵa jumys taýyp berýge men de atsalysyp otyramyn. Jumys izdeımin jan-jaqtan, tapsyrystar qabyldaımyn», - deıdi tseh meńgerýshisi Orynkúl Orazbaeva.