Kásipker kóshe tazalaıtyn qyzmetkerlerge tegin sháı taratyp júr
ASTANA. QazAqparat - Ádette, kúz aıaǵy taıasa, qylyshyn súıretip, qys ta jetetinin biletin Astana turǵyndary bıylǵy qarashada qyryq gradýstyq aıaz túsetinin kútpegen edi.
Al, osy ýaqta kúzdiń kúni áli sýytpaıtyn Almatyǵa qarasha qalyń qardy biraq japty. Jalpy, bul eki qala ǵana emes, Qazaqstannyń basym bóligi qazir aýa raıynyń qolaısyzdyǵynan ábigerge túsip jatyr, dep habarlaıdy QazAqparat.
Turǵyndar sany kóp, aýmaǵy úlken Almaty men Astananyń kommýnaldyq qyzmetteri qar tazalap, muz qyryp úlgere almaı jatyr. Qar kúreıtin tehnıka men talaı avtobýs aıazǵa shydamaı, toqtap qaldy. Endeshe, qoldarynan kúrek túspeı, kúni-túni kóshe tazalap, qar tazalaıtyn adamdardyń jaǵdaıyn oılaı berińiz...
Mine, osyndaı qyzmetkerlerdiń jaǵdaıyn oılaǵan kásipker eki qalada tegin sháı men ystyq tamaq taratýdy qolǵa aldy.
«Keshe jaýǵan qar tańǵajaıyp boldy. Qalanyń aýasy tazaryp, balalar máz-meıram kúıge tústi. Alaıda, bul kún kommýnaldyq qyzmet úshin aýyrǵa soǵyp otyr. Ssebebi, qar áli basylmaǵandyqtan, qala kóshelerin tazalap úlgere almaýda. Árıne, ádettegideı, kommýnaldyq qyzmettiń jumysyn synaı ketýge bolar ed. Alaıda, qarashada Almatyda munsha qar jaýady dep eshkim de oılamaǵan edi.
Biz, meıramhanadaǵy áriptesterimizben birge kúni-túni qala kóshelerin qardan tazalap júrgen osy jumysshylardy qoldaıyq dep otyrmyz. Búginnen bastap biz olarǵa (ázirge 200 adamǵa, al, jalpy qalada 2 myńnan asa jumysshy bar deıdi) ystyq tamaq pen ystyq sháı tasyp beremiz. Bul josparlamaǵan shara bolǵandyqtan, ystyq sháı quıatyn termostar jetispeı jatyr. Eger de sizdiń úıde termos bolsa, birneshe kúnge bere turyńyz, zatyńyzdy búldirmeı, ózińizge qaıtaramyz. Bul sharany «tegin pıar» dep oılamańyzdar, sel júrgen kezde jumysshylarǵa kómekteskende áleýmettik jeli arqyly habarlandyrý bermegen edik. Sondyqtan, halyqty habarlandyryp, kómek suraý tıimdi eken, soǵan kózimiz jetti. Kúnderińiz sátti ótsin», - dep jazǵan Rumi Group meıramhanalar jelisiniń basqarýshy áriptesi Qýanysh Shonbaı.
Bul meıramhanalar jelisiniń Astanadaǵy núktesi de osyndaı aktsııa ótkizip, elordanyń qatty aıazynda dalada júretin kommýnaldyq qyzmettiń jumysshylaryna ystyq tamaq pen ystyq sháı taratyp júr.
