Kásipker «BJK-2025» baǵdarlamasynyń bıznes úshin baǵa jetpes qoldaý ekenin aıtty
Tursynbek Degenbaev - elimizde jip ónimderin jasaıtyn jalǵyz adam.
2016 jyly kásipker «Bıznestiń jol kartasy-2020» baǵdarlamasy aıasynda 3 mln teńge jeńip alǵan edi. Bul qarajatqa jip ıirý apparatyn alyp, bıznesiniń órisin keńeıtti. Qazirde úsh mashınamen jumys jasap otyr. Onyń aıtýynsha, osy kásip túrimen aınalysýyna ata-anasy túrtki bolǵan.
«Ata-anam mal baqqan adamdar. Mal sharýashylyǵy úshin arqan óte qajet zat ekeni bárine belgili. Anam sharýashylyqqa kerek arqandardy qolmen attyń jalynan esetin. Áıel adamnyń qoly názik bolǵandyqtan, jarylyp ketetin. Únemi qasynda kómektesip júrgendikten anamnyń qolynyń jaralanyp, aýyrǵanyn kórip, janym ashyp «óskende eń birinshi arqan esetin mashına oılap tabamyn» dep ózime sóz berdim. Osy qıyndyqty búkil aýyl sharýashylyǵyndaǵy qazaq malshylary kórdi deýge bolady. Búginde sol bala kezdegi arman-maqsatym oryndaldy», - deıdi kásipker.
«Bıznestiń jol kartasy-2020» baǵdarlamasy aıasynda baıqaýǵa qatysyp, jobasyn usynamyn degen talapkerge shekteý joq. Kásibi bar kez kelgen azamat memlekettik grantqa qol jetkize alady.
«Men grant týraly BAQ arqyly bildim. «Atameken» ulttyq kásipkerler palatasy ashylǵannan beri osy kisilerdiń jumysyn zerttep júrdim. Almaty qalasy ındýstrıaldy-ınnovatsııalyq basqarmasynda aımaqtyq úılestirý keńesi meniń bıznes-josparymdy maquldap, grant berdi. Elbasynyń osy baǵdarlamany odan ári jalǵastyrý týraly aıtqanyn qýana qabyldadym. Bul men sııaqty kóptegen adamdarǵa múmkindikter esigin ashady», - dedi T.Degenbaev.
Aıta ketý kerek, Prezıdent Nursultan Nazarbaev bıylǵy «Qazaqstandyqtardyń ál aýqatynyń ósýi: tabys pen turmys sapasyn arttyrý» atty Joldaýynda «Bıznestiń jol kartasy-2020» baǵdarlamasyn 2025 jylǵa deıin sozý kerektigin aıtty.
Qazirgi ýaqytta QR Ulttyq ekonomıka mınıstrligi Ekonomıkalyq zertteýler ınstıtýtymen, sondaı-aq belgili ǵalymdar tobymen birlesip, álemdik tájirıbeni zerdeleı otyryp, elimizdiń aýmaqtyq-keńistiktik uıymdastyrylýyn jetildirý jóninde taldamalyq zertteý júrgizip jatyr.
