Kásipker bolǵym keledi: Nur-Sultanda 14 jastaǵy jasóspirim jemis-jıdek dúńgirsheginde jumys isteıdi

Ol anasy men qaryndastaryna kómektesýmen qatar, tabys taýyp, óz kásibin ashqysy keledi. Mekteptegi sabaqtan keıin kún saıyn 4 saǵat jumys istep júrgen jasóspirim QazAqparat tilshisimen óziniń bolashaqtaǵy arman-maqsattary týraly aıtyp berdi.

«Meniń jasym 14-te. Qaladaǵy №15 mektep-gımnazııasynyń 8 synybynda oqımyn. Túske deıin sabaqta, tústen keıin jumystamyn. Bul jumysty 1 apta buryn ǵana taptym. Munda men satýshynyń kómekshisimin. Meniń mindetim jemis-jıdekter men kókónisterdi ornyna rettep qoıý, jaramsyzdaryn tazalaý jáne kelýshilerge salyp berýge kómektesý. Jalpy jumysty biraz ýaqyt izdedim. Kóp adamdardan jumys taýyp berýin suradym, onyń ishinde tanymal adamdar da bar. Osy jumysqa deıin Táńirbergen Berdońǵarǵa jumys taýyp ber dep ótinish jasadym. Biraq kóbi jasym kámeletke tolmaǵandyqtan jumysqa qabyldaýdan bas tartty. Osy jerdegi jumysty Aıbol degen bloger arqyly taptym, men oǵan jumys istegim keletinin aıttym, ol meni osy jerdiń ıesimen tanystyrdy», - deıdi Temir Nurıslıam.

Onyń aıtýynsha, jumys isteýi úshin ata-anasynyń ruqsatyn alǵan jáne ol apta boıy demalyssyz jumys isteıdi.

«Úıde 3 aǵaıyndymyz. Men úıdiń úlkenimin, ózimnen keıin 2 qaryndasym bar. Kún saıyn saǵat 15:30-dan 19:30-ǵa deıin jumystamyn. Buryn sabaqtan bos kezimde kúreske qatysyp sportpen aınalysqanmyn. Ýaqyt óte kele sporttan góri, jumys istep, aqsha taýyp, óz bıznesimdi ashý ıdeıasy durys degen oıǵa keldim. Qazir aqsha jınaýdamyn, oǵan saǵyzǵa arnalǵan avtomat satyp alyp, dúkenderge qoıyp, qosymsha tabys tapqym keledi. Nege ol qurylǵy deseńiz, bir kúni Discovery kanalynan saǵyzǵa arnalǵan qurylǵynyń qalaı jasalatyny jáne odan keletin paıda men tabys týraly vıdeo kórdim, sodan soń maǵan ony satyp alý ıdeıasy keldi. Bul qurylǵy saqtandyrý jumystarymen birge alǵanda 40 myń teńge turady. Buıyrsa 1 aıdyń kóleminde aqsha jınap alamyn dep oılaımyn», - dedi ol.

Jasóspirimniń sózinshe, ol buǵan deıin de úıine kómektesý maqsatynda ártúrli jumys istegen. Sonymen qatar, Temir eńbek etý jasyna tolmaǵan jetkinshekterdiń jumys isteýine qatysty óz pikirin bildirdi.

«Meniń osynda jumys isteıtinimdi ustazdarym men synyptastarym bilmeıdi. Olarǵa ázirge aıtqan joqpyn. Iá, meniń jasym jetpegendikten kóp jerde meni jumysqa almady. Bastysy meniń ata-anamnyń ruqsaty bar jáne men óz erkimmen isteýdemin. Meniń maqsatym - anam men qaryndastaryma kómektesip, solardy qamtamasyz etý. Óz bıznesimdi ashsam degen josparym da bar, ol úshin sen sol salany jaqsy bilýiń kerek, tájirıbe qajet. Al bul jerde men bir jaǵynan tabys taýyp, ekinshi jaǵynan tabys tabýdyń qyr-syryn úırenip jatyrmyn. Men bul jerde biraz nárseni óz kózimmen kórip, úırendim. Eger jumys istemegen jaǵdaıda sol 4 saǵat úıde jaıdan jaı ótetin edi. Sondaı-aq qolym bos kezde ınternetten bıznesti bastaýǵa qatysty túrli dáristerdi tyńdap, qaraımyn»- dep toqtaldy ol.

Astanalyq jasóspirim mektep bitirgen soń qandaı mamandyqty tańdaıtynyn ázirge naqtylamaǵan.

«Mektep bitirgen soń qandaı mamandyqty tańdaıtynymdy áli sheshken joqpyn. Ýaqyt kórseter. Meniń biletinim bıznes ashý úshin esepke júırik bolý kerek jáne til bilý qajet. Sol úshin qazir matematıka men aǵylshyn tilin tereńdetip úırenýdi qolǵa alǵaly jatyrmyn», - deıdi Temir.

Odan bólek, biz jasóspirimge jumys berýshiniń pikirin tyńdap kórdik.

«Maǵan tanysym habarlasty. Osyndaı jas bala bar, jumys istegisi keledi, óte shıraq dedi. Men oılanaıyq dedim. Sodan habarlasyp, osy jańadan ashylǵan jemis-jıdek pen kókónister satatyn dúńgirshekke satýshynyń kómekshisi etip aldym. Temir erekshe bala, maǵan onyń eńbek etýge degen yntasynan bólek, onyń jasyna qaramastan tereńinen, áriden oılaıtyny erekshe áser qaldyrdy. Taǵy bir aıtyp ótetin jaıt, Temir qazirgi jasóspirimder sekildi gadjet, kompıýterlik oıyndarǵa qyzyqpaıdy jáne ol aqsha jınaý úshin jalaqyny ár aıdyń sońynda berýdi surady. Ol aqsha jınaǵysy keledi. Árıne men jumyspen qatar oǵan óz bilgenimdi aıtyp, jón kórsetip júrmin. Sebebi men de óz kásibimdi 17 jasymda bastaǵam. Sondyqtan ony jaqsy túsinemin», - deıdi jemis-jıdek dúńgirsheginiń ıesi Sanjar Kárimbekov.