Kásipker blokposttaǵy qyzmetkerlerge úsh mezgil tamaqty tegin jetkizýde
TÚRKІSTAN. QazAqparat - Túrkistan oblysy Keles aýdanynyń týmasy, jeke kásipker Danııar Qalymbetov blokposttarda táýlik boıy kezekshilikte turǵan mamandardy úsh mezgil ystyq tamaqpen tegin qamtamasyz etip otyr, dep habarlaıdy QazAqparat.
Jeke bıznesi Qaraǵandy qalasynda shoǵyrlanǵanyna qaramastan, eldegi jaǵdaıdy syrttan baqylap otyra bermeı, qıyn kezde jurtqa járdem berýdi azamattyq paryzy sanaǵan kásipker týǵan óńirge qashyqtyqtan uıymdastyryp kómegin kórsetip otyr. «Biz birgemiz» aktsııasy aıasynda 5 sáýirden bastap Jetisaı, Shardara, Tólebı aýdandarynda óz mamandarymen blokposttarda aıanbaı aqysyz qyzmetterin kórsetýde.
«Tóle bı men Jetisaı aýdandaryndaǵy blokposttarda táýlik boıy kezekshilikte turǵan mamandardy tegin úsh mezgil ystyq tamaqpen qamtamasyz etip otyrmyz: olar Jetisaıda 30-ǵa jýyq blokbeket mamandary, Tóle bı aýdanynda aralyǵy 25 shaqyrym bolatyn 5 blokbekette 60-qa jýyq maman. Qajetti shyǵyndardy: azyq-túlikterdi, kólikter men janarmaıdy, jumysshylardyń jeke saqtaný kerek-jaraǵyn, antıseptıkterdi óz tarapymyzdan aldyq. Eki saǵattyq qashyqtyqtaǵy blokbeketterge tamaq arnaıy termobokstarmen ystyq kúıinde jetkizilýde. Budan bólek, Shardarada karantınge alynǵan medıtsına qyzmetkerlerin jergilikti demeýshiler alyp kelgen azyq-túlik esebinen ashana blogyn uıymdastyryp, úsh mezgil ystyq tamaqpen qamtyp jatyrmyz. Ashana jumysshylary qorǵanysh quraldarymen jáne antıseptıktermen jaraqtandyrylǵan. Elge aýyrtpashylyq túsken osyndaı kezde el azamattary aıanbaı eline, jurtyna járdem berýi kerek dep oılaımyn», - dedi kásipker.
Aıta keterligi, Danııar Qalymbetov basqaratyn ujym memlekettik-jekeshelik áriptestik aıasynda Túrkistan oblysynyń 20 mektep-ınternatynyń ashanalaryn jańǵyrtý jəne paıdalaný kelisim shartymen jumys isteýde.
