Kásipker áıeldi urlap, aqsha bopsalaǵan qaraǵandylyq 12 jylǵa sottaldy
QARAǴANDY. QazAqparat - Grýzııanyń týmasy, Qaraǵandy oblysynyń turǵyny Shota Djavahıshvılı Temirtaýda kásipkerdi urlap, aqsha bopsalaǵany úshin 12 jylǵa bas bostandyǵynan aıyryldy, dep habarlaıdy «QazAqparat» HAA tilshisi.
Tergeý barysyna Bas prokýratýra aralasqannan keıin atalmysh is jurtshylyq nazaryna ilikken bolatyn. Qadaǵalaý organy Temirtaý prokýratýrasynyń jumysyn tekserip, óńirlik alqanyń tergeý barysyn uzaqqa sozǵanyn anyqtaǵan. Zardap shekken kásipker úsh jyl boıy kúdiktilerdi qamata almaı, isti sotqa ótkize almaı kelgen. Burynǵy basshylyq birqatar buzýshylyqtar úshin otstavkaǵa ketti.
Prokýratýranyń jańa basshysy Arman Ahanov isti óz baqylaýyna alyp, atalmysh isti sotqa jibergen. «23 jastaǵy aıyptalýshy bes bap boıynsha - QR QK 125-babynyń 2-tarmaǵy «Adam urlaý», 192-baptyń 2-tarmaǵy «qylmystyq toppen qaraqshylyq jasaý», 194-baptyń 3-tarmaǵy «Qorqytyp alý», 200-baptyń 4-tarmaǵy «Avtomobıldi zańsyz ıelený» jáne 251-baptyń 1-tarmaǵy «Qarýdy zańsyz saqtaý, tasymaldaý jáne alyp júrý» boıynsha kináli dep tanyldy», - dep habarlady sottyń baspasóz qyzmeti.
Aıyptalýshy Shota Djavahıshvılı qatań rejimdegi túzetý kolonııasynda 12 jylǵa bas bostandyǵynan aıyryldy. Shota Djavahıshvılıdiń úsh sybaılasy bolǵany anyqtaldy. Eki kúdiktige qatysty qylmystyq is tergelýde, olarǵa jeke óndiris bólindi. Sottalýshynyń kórsetken úshinshi boljaldy qylmyskeri - Meıram Alpysbaev. Buryn habarlanǵandaı, tergeýshi Alpysbaevtyń ózin tergeı almady, sebebi ol kásipkerge qastandyq jasalǵan túni óli kúıinde tabylǵan edi.
Sot materıaldary boıynsha, Shota Djavahıshvılı, Meıram Alpysbaev jáne olardyń taǵy eki sybaılasy kásipker áıeldi kóligin turaqqa qoıyp, úıine bettegende urlap áketken . Áıeldi ormanǵa aparyp, soqqyǵa jyqqan jáne iri kólemde aqsha talap etken. Onyń altyn áshekeılerin sheship alyp, ámııanyndaǵy aqshany da ıemdengen jáne áıeldi júksalǵyshqa salǵan. Іri somada qarajat jymqyrý maqsatynda kásipkerdiń páterine barǵan qaskóıler úıge kire almady. Kásipkerdiń kishkentaı qyzy olarǵa esikti ashpaǵan. Qylmyskerlerler ózderin polıtsııamyz dep tanystyrǵan. Alaıda, qyz óz anasynyń tanysyna habarlasqanda, qaskóıler izin sýytqan. Sol arada kásipker áıel júksalǵyshtan shyǵyp, jolaı toqtaǵan kólikpen jaqyn mańdaǵy polıtsııa bólimine jetken. 
