Kásipker áıeldi óltirýge jubaıynyń tanysy qatysqan - OQO
ASTANA. 6 qarasha. QazAqparat - Ońtústik Qazaqstan oblysynyń krımınaldyq polıtsııa qyzmetkerleri 27 jastaǵy kásipker áıeldiń ólimine qatysy bar degen kúdikpen eki azamatty qolǵa túsirdi.
Bul týraly búgin QR Іshki ister mınıstrliginde vedomstvonyń resmı ókili Nurdildá Oraz málim etti.
Poltsııanyń habarlaýynsha, ustalǵandardyń biri qaıtys bolǵan áıeldiń jubaıynyń tanysy bolyp shyqqan.
1 qarashada jábirlenýshiniń týystary polıtsııaǵa habarlasyp, onyń bir kún buryn aqsha alyp kelý úshin bankke ketip, sodan qaıtyp oralmaǵanyn jetkizgen. Habarlama kelip túsken kúnniń ertesine Syrdarııa ózeninen Sol jaǵalaý kentine jaqyn mańda tunshyqtyrylyp óltirilgen áıel adamnyń máıiti tabyldy. Jábirlenýshi keptirilgen jemis-jıdekter satýmen aınalysqan. 31 qazan kúni onyń bankten 600 myń teńge alǵandyǵy belgili bolyp otyr. Anyqtalǵandaı, 23 jastaǵy Saryaǵash aýdanynyń eki turǵyny áıel adamdy kólikke otyrǵyzyp, tunshyqtyryp óltirip, keıin máıitti ózenge laqtyryp jibergen. Qylmystyq is qozǵalyp, kúdiktiler qamaýǵa alyndy. Jalpy somasy 450 myń teńge kóleminde aqsha tárkilenip alyndy.
