Kásipker aýyl mektebine robot tehnıkasy kabınetin syılady

KÓKShETAÝ. QazAqparat – Aqmolalyq kásipker aýylyndaǵy orta mektepke IT-tehnologııa kabınetin tolyq jabdyqtap berdi, dep habarlaıdy QazAqparat tilshisi.

Esil aýdanynyń Zarechnyı aýylynda «Zarechnyı» JShS dırektory Ýálıhan Áripov orta mektepke robot tehnıkasy kabınetin syılady. Kásipker «Nur Otan» partııasynyń mektepterde IT-tehnologııa kabınetterin ornatý jobasyna qoldaý bildirip otyr. Kabınet quny 4 mıllıon teńge bolatyn qazirgi zamanǵy qural-jabdyqtarmen jáne jıhazben jabdyqtalǵan.

«Kabınetke ınteraktıvti taqta, 3D prınter, noýtbýk jáne Arduino jıyntyǵy satyp alyndy. Bul metsenat Ýálıhan Áripovtyń aýyldastary úshin jasap otyrǵan alǵashqy jaqsylyǵy emes, buǵan deıin de talaı márte qaıyrymdy ister atqaryp halyqtyń alǵysyna bólenip keledi. Sol sebepti, mektep ujymy kásipkerge shynaıy alǵysyn bildiredi», deıdi vedomstvonyń baspasóz qyzmetindegiler.