Kásipker ana: Elordada úı sharýasyndaǵy áıelderge tabys tabýdy úıretetin joba bar
Ótken jyly Nur-Sultanda «Kásipker ana» pılottyq jobasy iske qosyldy. Áleýmettik az qamtylǵan áıelderge arnalǵan jobaǵa búginge deıin 700-ge jýyq ótinim tústi.
«Elimizde bıznes ashý úshin qolaıly jaǵdaı bar. Ózim Reseıde týdym, sol jaqta óstim. Salystyrmaly túrde aıtar bolsam ol jaqta Qazaqstandaǵydaı kómek joq. Munda tek moratorıı, kommýnaldyq tólemder arzan, «Damý» qory bar, arzan mólsherlememen nesıe beredi jáne basqalar. Keıde biz qolda bardy baǵalamaıtyn sııaqtymyz. Al áleýmettik az qamtylǵan áıelderge keletin bolsaq, árıne olardyń óz kásibin bastaýǵa múmkindigi joq. Bilim, daǵdy kerek. Osy joba arqyly jumyssyz áıelderdi kreatıvti oılaýǵa daǵdylandyrýdy kózdedik», – deıdi Aınur Ámirhan.
Az ýaqyt ishinde 200-den astam adam qysqa merzimdi kýrstan ótti. Qajetti daǵdyny meńgergen soń óz isin bastap, aqsha tabýdy úırengender bar.
«Bir kópbalaly anamyz óz úıinde quımaq pisiredi. Biz oǵan jarnama jasap kómektestik. Tapsyrystyń kóp bolǵany sonsha, oǵan tipti balalary da kómektesti. Eki apta boıy jumys istep jınaǵan aqshaǵa balalaryna sapaly kıim satyp áperdi. Taǵy bir ana ydys-aıaqty jalǵa berý arqyly aqsha taýyp otyr. Qonaq shaqyrǵanda ústeldi jabdyqtaý qyzmetine suranys joǵary ekenine kóz jetkizdik. Aıta bersek, jobadan keıin óz kásibin dóńgeletip áketken analar kóp. Eń bastysy - olar alysqa barmaı-aq qolynan keletin is arqyly aqsha tabýdy úırenýde. Sondaı-aq ol jumysqa balalaryn da aralastyryp, olardy erte jastan eńbekke baýlyp otyr», – dep qosty joba jetekshisi.
Karantınge deıin offlaın formatta ótken oqý koronavırýs pandemııasyna baılanysty onlaın formatqa kóshirildi. Oqý ІT-baǵdarlamalaý, SMM, aspazdyq, grafıkalyq dızaın, massaj, kondıter, koých-psıholog jáne basqa baǵyttar boıynsha júrgiziledi. «Kásipker ana» jobasyna kópbalaly, jalǵyzbasty, múgedek bala tárbıeleıtin jáne AÁK alatyn analar qatysa alady.
«Instagram jelisinde «Kásipker ana» degen paraqshamyz bar. Onda telegram-bottyń siltemesi kórsetilgen. Jobaǵa qatysqysy keletin analar qajetti aqparatty sodan taba alady. Karantınge baılanysty biraz josparymyz ózgerdi. Ázirshe oqý tek onlaın ótip jatyr. Karantın alynǵan soń onlaınmen birge offlaın oqytýdy da qaldyramyz dep otyrmyz. Máselen, múgedek balasy bar analarǵa úıden shyqpaı-aq onlaın oqyǵan yńǵaıly», – deıdi jobanyń úılestirýshisi Madına Ibraeva.
Jobanyń jetekshileri «Kásipker ana» - pılottyq bolǵandyqtan keıbir tustary jetildirýdi qajet etedi, karantınnen soń odan ári jetildirip, tolyqtyramyz dep otyr.
