Kásipker Almaty oblysyndaǵy jaǵdaıy tómen otbasylarǵa 10 úı salyp berdi

TALDYQORǴAN. QazAqparat – Almaty oblysyndaǵy Jambyl aýdanynyń Aqterek aýylynda búginge deıin baspanaǵa muqtaj 130 otbasyǵa úı salyp bergen kásipker taǵy da 10 januıany baspana syılady, dep habarlaıdy QazAqparat tilshisi.

Kásipker Temirlan Sháınúsipov qurylysy aıaqtalyp qalǵan úılerdiń úsheýiniń kiltin ózi arnaıy tabys etti.

Jańa úıdi kásipker jaǵdaıy tómen jáne kópbalaly otbasylarǵa arnap salǵan.

Qonys toıyn toılap otyrǵan Moldashevtar otbasynyń aıtýynsha, úı zaman talabyna saı salynǵan.
«5 bólmeli úı zaman talabyna saı, ystyq sý, sýyq sý kirgizilgen. Ájethanasy da úıdiń ishinde. Eki balammen tar úıinde áke-sheshemen turyp júr edik. Jas otbasy dep jańa baspana syılap otyrǵan qaıyrymdy janǵa alǵysymyz sheksiz» , - deıdi Ashat Moldashev.
Aıta keteıik,12 jyldan beri óz aýyldastaryna úı salyp júrgen kásipker bıyl 50 oryndyq «Darııa» balabaqshasyn salyp, 15 adamdy turaqty jumyspen qamtyǵan.