Kásipker 5 balaly otbasyǵa baspana syılady – Túrkistan

TÚRKІSTAN. QazAqparat - Túrkistan oblysy, Báıdibek aýdanynda jergilikti kásipker bes balaly otbasyǵa baspana alyp berdi, dep habarlaıdy QazAqparat tilshisi.

Shaqpaq eldimekeniniń turǵyny Gúlmıra Seıilbekovanyń buǵan deıin óziniń jeke úıi bolmaǵan. Kóp balaly ana jyldar boıy 5 balasymen tabylǵan baspanany panalap kelgen. Osyny eskergen jany jomart jandar Qazaqstan Musylmandary Dinı basqarmasynyń 30 jyldyǵyna oraı jáne «Zeket» korporatıvtik qory arqyly 4 bólmeli úıdiń kiltin tabys etti. Igi sharaǵa «Asqar-Taý» sharýa qojalyǵynyń tóraǵasy Asqar Orazhanuly demeýshilik tanytty. Qaıyrymdy jandardyń jomarttyǵyna rıza bolǵan kópbalaly ana alǵysyn bildirdi.Ózderine berilgen turǵyn úıdiń mektep pen balabaqshaǵa jáne sporttyq alańshaǵa jaqyn ornalasqanyna erekshe qýanyshyn jetkizdi.

Aıta keteıik, Báıdibek aýdanynda bıyl osymen úshinshi otbasyǵa demeýshiler esebinen úı berilip otyr.