Qasym-Jomart Toqaevtyń tańdaýly sózderiniń jınaǵy jaryq kórdi
ASTANA. KAZINFORM – Prezıdent Qasym-Jomart Toqaevtyń «Ádiletti qoǵamǵa – shynshyl sóz» atty tańdaýly sózderiniń jınaǵy jaryqqa shyqty. Bul týraly Prezıdenttiń ishki saıasat máseleleri jáne kommýnıkatsııalar jónindegi kómekshisi Arman Qyryqbaev áleýmettik jelide jarııalady.
Bul – Memleket basshysynyń Qazaqstandy Ádiletti, Qaýipsiz jáne Órkendegen elge aınaldyrýdy kózdegen uly muratynyń sózben kómkerilgen jıyntyq beınesi.
– Qurmetti dostar! Sóz qadirin túsinetin, kókiregi oıaý, zerdeli qaýymǵa aıtar jańalyǵymyz bar. «Ádiletti qoǵamǵa – shynshyl sóz» degen atpen Qazaqstan Respýblıkasynyń Prezıdenti Qasym-Jomart Kemeluly Toqaevtyń tańdaýly sózderiniń jınaǵy jaryq kórdi. Jınaq bolǵanda, bul – Memleket basshysynyń Qazaqstandy Ádiletti, Qaýipsiz jáne Órkendegen elge aınaldyrýdy kózdegen uly muratynyń sózben kómkerilgen jıyntyq beınesi. ıAǵnı sanaly ǵumyryn memleket isine arnaǵan tulǵanyń sońǵy otyz jyldan asa ýaqyt ishinde kóńilge túıgeni, oıǵa tamyzyq bolǵan ustanymdary men qundylyqtary. Osy jınaqty qurastyrý kezinde kózimiz jetken anyq jaıt – kúrdeli jáne ótpeli kezeńde memleketke basshy bolatyn tulǵanyń el bolashaǵy, ult sapasy jaıly pikir-kózqarasy budan ondaǵan jyldar buryn qalyptasqan. Odan soń ómirlik jáne kásibı tájirıbe negizinde júıelenip, búginde memlekettik saıasattyń basym baǵyttaryna aınalyp otyr, - dedi Arman Qyryqbaev.
Kitapta túrli taqyryptar toptastyrylǵan. Ár jyldary aıtylǵan sózderin muqııat oqyǵan kózi qaraqty oqyrman muny ózi de ańǵarady.
– Bizdiń maqsat – «sózin oqy jáne oıla» dep Hakim Abaı aıtpaqshy, taǵdyrsheshti kezeńde memleket tizginin ustaǵan Qasym-Jomart Toqaevtyń júrgizip otyrǵan saıasatynyń túp ózegin – prezıdenttik mıssııasyn óz sózimen negizdeý. Memleketimizdiń búgini men erteńin oılaǵan, damý baǵdaryn uǵynýǵa umtylǵan eljandy azamattardy osy kitapty oqyp-zerdeleýge shaqyramyn, - dep jazdy Prezıdenttiń ishki saıasat máseleleri jáne kommýnıkatsııalar jónindegi kómekshisi.
Kitap jaqyn arada barlyq memlekettik kitaphanalarǵa, ýnıversıtetter men kolledjderge, jastar ortalyqtaryna taratylady
