QR Prezıdentiniń Respýblıka kúnine oraı memlekettik nagradalar tapsyrý rásiminde sóılegen sózi

QR Prezıdenti Qasym-Jomart Toqaev Respýblıka kúnine oraı memlekettik nagradalar men syılyqtardy saltanatty túrde tapsyrý rásiminde sóz sóıledi, dep habarlaıdy Aqordanyń baspasóz qyzmeti. Kazinform Memleket basshysy sóziniń tolyq mátinin oqyrman nazaryna usynady. 

Qymbatty otandastar!

Qadirli qaýym!

Elimizdiń eń basty meıramy – Respýblıka kúni qutty bolsyn! Bul – qazaqtyń memlekettilik dástúri qaıta jańǵyrǵan tarıhı kún. Kók túrikter dáýirinen, Altyn Orda, Qazaq handyǵy zamanynan kele jatqan eldigimiz tamyryn tapqan kún. Bul – Alash arystarynyń azattyq jolyndaǵy arpalysy aqtalǵan kún.

Halqymyzda «Egemen bolmaı, el bolmas» degen sóz bar. Osydan 33 jyl buryn tarıhı ádildik ornady. Qazaqstannyń Memlekettik egemendigi týraly deklaratsııa qabyldandy. Osy mańyzdy qujat jurtymyzdyń azattyq alýyna jol ashty. Shyn máninde, Egemendik deklaratsııasyn qabyldaý ońaıǵa soqqan joq. Elimizdiń ulttyq quramy birkelki emes edi. Sol kezdegi Parlamentte, ıaǵnı Joǵarǵy Keńeste jáne búkil qoǵamymyzda uzaq pikirtalas, qyzý talqylaý boldy. Qujattyń ár sózin, ár babyn qorǵaýǵa týra keldi.

Álıhan Bókeıhan «Bostandyqqa aparatyn jalǵyz jol – ulttyq yntymaq qana» degen. El aǵalary halqymyzdyń ardaqty ulynyń bul ósıetine adal boldy. Olar jaýapty sátte uıymshyldyqpen ult múddesin qorǵaı bildi. Aqjoltaı qujat jurtymyzdyń talap-tilegine saı jazyldy, otanshyl azamattardyń aqyl-parasatynyń arqasynda qabyldandy. Olardyń syn saǵattaǵy batyldyǵyn naǵyz erlik dep baǵalaýǵa bolady.

Biz qazir Ádiletti Qazaqstandy quryp jatyrmyz. Sondyqtan ótken zamannyń qaıratkerlerine, olardyń eńbegine laıyqty, ádiletti baǵa berip otyrýymyz kerek. Azattyq jylnamasynda Salyq Zımanov, Serikbolsyn Ábdildın, Qarataı Turysov, Zınaıda Fedotova, Erik Asanbaev, Ábish Kekilbaev, Ǵaırat Saparǵalıev, Sultan Sartaev, Ózbekáli Jánibekov, Oljas Súleımenov, Aleksandr Knıagının, Myrzataı Joldasbekov, Ómirbek Baıgeldi, Qýanysh Sultanov, Sergeı Tereşenko jáne taǵy basqa kóptegen tulǵanyń esimin qurmetpen atap ótý kerek. Elin súıgen erlerdiń otanshyldyǵy jáne olardyń ult múddesine adaldyǵy árdaıym keıingi urpaqqa úlgi-ónege bolýǵa tıis. Biz tarıhı ádildik jolyn berik ustanýymyz kerek. Osy oraıda, tuńǵysh prezıdent Nursultan Ábishuly Nazarbaevtyń tarıhı rólin atap ótken jón. Sebebi ol elimizdiń táýelsiz memleket atanyp, tuǵyryn bekemdeýge orasan zor eńbek sińirdi.

Ardaqty aǵaıyn!

Qazaqta «Egemen eldiń eńsesi bıik» degen sóz bar. Azattyqpen birge ulttyń rýhy kóterildi. Halqymyz kóptegen tabysqa jetti. Táýelsizdik jyldaryn bizdiń halqymyz abyroımen júrip ótken dara jol deýge bolady. Osy kezeńde biz qýatty ári jaýapty memleket retinde qalyptastyq, eldigimizdiń tuǵyryn nyǵaıttyq. Kók týymyz Birikken Ulttar Uıymynyń tórinde tur. Kórshi eldermen syndarly kelissóz júrgizip, shekaramyzdy birjola shegendedik. Sonyń arqasynda shynaıy dostyq shekarasy qalyptasty, sondaı-aq ulttyq qaýipsizdigimizdi qamtamasyz ettik.

Memleketimizdiń jetistikterin qaperden shyǵarmaı, únemi aıtyp júrý kerek. Óıtkeni onyń bári – Qazaqstannyń shynaıy egemendiginiń jemisi. Sonymen birge, árıne, qatelikter de boldy. Ony umytpaǵan jón. Qazaqstannyń turaqty damýyn qamtamasyz etý úshin odan qorytyndy jasalýǵa tıis.

Elimiz sońǵy jyldary túbegeıli jańǵyrdy. Biz aýqymdy, biregeı konstıtýtsııalyq reforma jasadyq. Bul mańyzdy qadam bizdiń geosaıası ortamyzdy alyp qarasaq, teńdessiz reforma boldy. Jalpyulttyq referendýmda halqymyz bul ózgeristerge barynsha qoldaý bildirdi. Azamattardyń saıası úderiske qatysý múmkindigi aıtarlyqtaı artty. Memleket pen qoǵamnyń qarym-qatynasy jańa sıpatqa ıe boldy. ıAǵnı, jalpyulttyq dıalogtyń aýqymy keńeıdi. Prezıdent jeti jylǵa bir ret qana saılanatyn boldy. Aralas saılaý júıesi engizildi. Munyń bárin saıası reformanyń basty mazmuny deýge bolady.

Osydan týra bir jyl buryn men aýqymdy saılaý kezeńi bastalatynyn aıtqan edim. Qysqa merzim ishinde Prezıdent, Senat pen Májilis, barlyq deńgeıdegi máslıhattar saılaýy kezeń-kezeńimen ótti. Onyń bári jańa ári ádil erejemen júrgizildi. Bul saılaýlar azamattarymyzdyń saıası jáne saılaý mádenıetiniń deńgeıi óskenin kórsetti. Aýyl ákimderin tikeleı saılaýdyń engizilýi saıası reformadaǵy asa mańyzdy qadamnyń biri boldy. Qazirge deıin 1900-den astam aýyl okrýgynda saılaý ótti. Aýyl ákimderiniń 60 paıyzǵa jýyǵy jańardy.

Jaqynda aýdan jáne oblystyq mańyzy bar qala ákimderin azamattarymyz tikeleı saılaıtyn bolady. Ázirge jańa tásildiń tıimdiligin baıqap kóremiz. Adam quqyǵyn qorǵaý júıesi jetile tústi. Konstıtýtsııalyq Sot qaıta quryldy. Ombýdsmenderdiń mártebesi kóterilip, quzyreti keńeıdi. Turmystyq zorlyq-zombylyq jasaǵan adamdarǵa jaza kúsheıtildi. Qazaqstan áleýmettik salada aıtarlyqtaı tabysqa qol jetkizdi.

Halyqtyń densaýlyǵyn jaqsartý úshin qomaqty qarjy bólinip jatyr. Sonyń nátıjesinde azamattardyń ortasha jasy 74,4 jasqa jetti. Bul – el tarıhyndaǵy rekordtyq kórsetkish.

Qıyndyǵy kóp bolǵan toqsanynshy jyldarda halyq sany kúrt azaıdy. Biz qazirgi tańda osy demografııalyq quldyraýdy eńserdik. Kóp uzamaı halqymyzdyń sany 20 mıllıonǵa jetedi. Bul elimizdiń turaqty damýynyń aıqyn kórinisi deýge bolady.

Bir sózben aıtqanda, azamattarymyz óz urpaǵynyń jarqyn bolashaǵyna jáne elimizdiń erteńine senimmen qaraıdy. «Ulttyq qor – balalarǵa» bastamasyn júzege asyrý úshin tıisti zań qabyldandy. Nebári eki aıdan keıin balalarymyzdyń esep-shotyna qarjy túse bastaıdy.

Memlekettik saıasattaǵy mańyzdy baǵyttyń biri – aımaqtardy jan-jaqty damytý. «Qýatty aımaqtar – qýatty memleket» degenimiz – jalań uran emes. Bul – Ádiletti Qazaqstandy qurýǵa qajetti eń basty qaǵıdat. Biz byltyr elimizdiń ákimshilik-aýmaqtyq qurylymyna birqatar ózgeris engizdik. Sol arqyly keıbir oblystyń damýyna tyń serpin berdik. Meniń tapsyrmammen aýyl-aımaqty damytý tujyrymdamasy qabyldandy. Bul qujattyń mán-mańyzy zor. Aımaqtarda áleýmettik, ınjenerlik jáne kólik ınfraqurylymyn qurý – basty mindet.

«Aýylda densaýlyq saqtaýdy jańǵyrtý» ulttyq jobasy bastaldy. Osy jobanyń aıasynda 655 ambýlatorııa jáne feldsherlik-akýsherlik nysan salynady, qural-jabdyqpen tolyq qamtamasyz etiledi. Buǵan qosa 20 aýdanaralyq kópbeıindi emhana ashylady, al 12 emhana zaman talabyna saı jańarady. ıAǵnı, tórt mıllıonnan astam aýyl azamatyna sapaly dárigerlik qyzmet kórsetiledi.

Elimizde «Jaıly mektep» jobasy qolǵa alyndy. 2026 jylǵa deıin barlyq aımaqta júzdegen jańa mektep boı kóteredi. Aýyldarda 100 sport ortalyǵy ashylady. Sondaı-aq 650 mádenıet oshaǵy salynady jáne jóndeledi.

Barshańyzǵa málim, men bıylǵy Joldaýymda elimizdiń Jańa ekonomıkalyq baǵdaryn usyndym. Basty qaǵıdattarymyz ádildik, ashyqtyq jáne shynaıy báseke bolmaq. ıAǵnı, biz qazir Jańa ekonomıkalyq saıasatqa jol ashyp otyrmyz. Negizgi maqsat – ult baılyǵyn ádil bólý, ınfraqurylymdy jedel jańǵyrtý, kásipkerlikke qoldaý kórsetý jáne elimizge aýqymdy ınvestıtsııa tartý.

Úkimet pen ákimder Memleket basshysynyń tıisti nusqaýlaryn, tapsyrmalaryn múltiksiz oryndaýǵa mindetti. Bul jumys Parlamenttiń jiti baqylaýynda bolýy kerek. Bir sózben aıtqanda, ekonomıkalyq ózgeristerdiń ıgiligin jaqyn arada elimizdiń barlyq azamaty kórýge tıis.

Qazaqstan egemen memleket retinde árdaıym ulttyq múddege saı keletin salmaqty ári syndarly syrtqy saıasat júrgizedi. Halyqaralyq qaýipsizdikti qamtamasyz etýdi kózdeıtin aımaqtyq jáne jahandyq úderisterde mańyzdy ról atqarady. Biz álemdik dinderdiń bir birimen jaqyndasyp, syndarly dıalog ornatýyna kúsh salamyz. Qazirgi zamanda memleketterdiń ujymdasyp kúsh jumyldyrýy jáne dıplomatııany danalyqpen ári joǵary kásibılikpen júrgizýi álemde uzaq ýaqyt boıy turaqtylyq ornaýyna, elderdiń jappaı damýyna, BUU-nyń Jarǵysyna negizdelgen ádiletti halyqaralyq qatynastar júıesi qurylýyna jol ashady. Qazaqstan «eldiń ishinde de, aınalasynda da beıbitshilik», «áralýandyq arqyly – birlikke» degen qaǵıdattardy árdaıym berik ustanady.

Qazaqstannyń aldynda buryn-sońdy bolmaǵan jańa syn-qaterler tur. Osy kúrdeli kezeńde memleketimizdiń ornyqty damýy óte mańyzdy. Biz bolashaqqa senimmen qaraǵan birtutas Qazaq elin kúlli álemge tanytýymyz kerek. Egemendikke qol jetkizý ońaı emes, al ony saqtap turý tipti qıyn. Shyn máninde, táýelsizdik – bárinen qymbat.

Táýelsizdikti saqtaý bul – eń aldymen, tutas ulttyń jaýapkershiligi. Biz egemendikti tynymsyz eńbekpen, myzǵymas birlikpen kún saıyn qorǵaýymyz kerek. Eń bastysy, elimizdegi turaqtylyqty saqtaýymyz qajet. Sebebi tynyshtyq bolmasa, basqanyń bári beker.

Álemdegi ahýaldyń qandaı kúrdeli ekenin kórip otyrsyzdar. Bedeldi halyqaralyq sarapshylar Qazaqstandy beıbitshiliktiń besigi dep ataıdy. Qazir biz aımaqtyń mádenı-rýhanı ortalyǵyna aınaldyq.

Bıyl sheteldiń óner ujymdary elimizde 200-den astam mádenı is-shara ótkizdi. Bul – turaqtylyqtyń, tynyshtyqtyń aıqyn kórinisi. Muny basqalarǵa úlgi-ónege deýge bolady. Al turaqsyzdyq jaılaǵan elge eshkim umtyla qoımasy anyq.

Beıbitshilik – bizdiń basty baılyǵymyz. Onyń qadirine jetip, baǵalaı bilý – bárimizge ortaq paryz. Muny elimizdiń árbir azamaty, ásirese, óskeleń urpaq tereń túsinýi qajet.

Qazaqstan damýdyń jańa kezeńine qadam basty. Saıası jáne áleýmettik-ekonomıkalyq reforma qoǵamdyq sananyń túbegeıli ózgerisine ulasýy kerek. Men Túrkistanda ótken Quryltaıda sóılegen sózimde jańa qoǵamdyq etıka týraly aıttym. Alqaly jıynnan soń Quryltaıdyń keıbir músheleri maǵan óz usynystaryn joldady. Olar elimizde qundylyqtar júıesin qalyptastyrý qajettigine nazar aýdarýda. Shyn máninde, muny óte mańyzdy bastama dep oılaımyn. Ony jan-jaqty talqylap, qarastyrýymyz kerek.

Men buǵan deıin Adal azamat uǵymyn usyndym. Osy oraıda, jastarymyzǵa arnaıy úndeý joldaǵym keledi. Elimizde júzege asyrylyp jatqan árbir bastama, eń aldymen, sizderge arnalady. Qazirgi reformalardyń ıgiligin kóretin de, eldik isterdi jalǵastyratyn da – sizder.

Búgingi jastardy Qazaqstannyń kelbeti deýge bolady. Shyn máninde, kez kelgen memleketti turǵyndaryna qarap baǵalaıdy. ıAǵnı, bizdiń qandaı el bolarymyz óskeleń urpaqqa baılanysty. Sondyqtan jastarymyz otanshyl, bilimpaz, eńbekqor, únemshil, ádil ári janashyr bolýy qajet. Jastar sportpen, dene shynyqtyrýmen aınalysýy kerek. Men muny únemi aıtyp júrmin. Osy qundylyqtardy barynsha nasıhattap, taratý qajet. Sonda jeke adamnyń qasıeti tutas ulttyń qasıetine aınalady.

Jastar kez kelgen ózgeriske beıim bolady. Ár nárseni boıyna tez sińiredi. Men sizderdi jaqsydan úırenýge, jamannan jırenýge shaqyramyn. Uly Abaı aıtqan bes nárseden qashyq, bes nársege asyq bolyńyzdar. Sizder dáriptegen qundylyqtar qoǵamda tez ornyǵady. Sizder qoldaǵan ózgerister jyldam júzege asady. Bárimizdiń tilegimiz – bir, bul – qoǵamymyzda jappaı ádilettik ornatý. Endeshe, maqsatymyzǵa birge jeteıik. Men jas urpaqtyń jasampazdyq qýatyna senemin. Ózderińiz sııaqty sanaly ul-qyzdary bar Qazaqstan órkenıet kóshiniń basynda bolary sózsiz.

Memlekettilik tuǵyryn nyǵaıta túsý úshin zań ústemdigin ornyqtyrý óte mańyzdy. Ádiletti Qazaqstandy qurý úshin quqyqtyq mádenıetti damytý qajet. Zańsyzdyq, tártipsizdik, mádenıetsizdik eldi jarǵa jyǵady. Mundaı jaǵymsyz úrdisterge búkil qoǵam bolyp qarsy turýymyz kerek. Al tártipke baǵynǵan qoǵam órkenıetti bolady. Bul – zańdylyq. Ár azamat elimizdiń zańyn qurmettese, bereke-birlik te, baqýatty turmys ta bolady. ıAǵnı, Zań tolyǵymen oryndalsa, tórt qubylamyz túgel bolmaq.

Biz birtindep qoǵamdy ózgertý jáne demokratııa qaǵıdattaryn engizý jolynan aınymaımyz. Álemde saıası jáne ekonomıkalyq ahýal qubylyp turǵan zamanda zań jáne quqyq ústemdigin qamtamasyz etý óte mańyzdy. Memleket radıkalızmniń, ekstremızmniń, quqyqtyq nıgılızmniń jáne turmystyq vandalızmniń kez kelgen kórinisine múldem tózbeýshilik saıasatyn ustanatyn bolady.

Elimiz óktemdik pen óshpendilikke, qoǵamdyq tártipti aıaq asty etýge, zorlyq-zombylyqqa shaqyrýǵa, azamattardyń ar-namysyn taptaıtyn áreketter jasaýǵa jol bermeıdi. Zańǵa qaıshy keletin, azamattardyń arasyna iritki salatyn jáne turaqtylyqqa syna qaǵatyn kez kelgen sóz ben áreketke qatań tosqaýyl qoıady. Bul talapqa baǵynbaý memleketke de, qoǵamǵa da qarsy shyǵý dep baǵalanady. Munyń bárin, ásirese, el aldynda júrgen jáne halyqqa sózi ótimdi azamattar tereń túsinýi kerek.

Eki jylǵa da jetpeıtin az ýaqytta elimizde iske asyrylǵan reformalar halyqtyń saıası sana-sezimin edáýir ózgertti. Endi jurtymyz memleketti basqarýdyń burynǵy tásilin qaıtarýǵa jol bermeıtinine senimim mol. Reformalardan keıin ótkenge qaıta oralmaımyz. Ózgerister áli jalǵasady jáne memleketimizdiń sıpatyn tolyq ózgertedi.

Biraq biz reformany júzege asyrǵanda, eń aldymen, ishki saıası turaqtylyqtyń mańyzdylyǵyn esten shyǵarmaýymyz kerek. Áıtpese, Qazaqstannyń memlekettiligine zor qaýip-qater tónýi jáne onyń saldary ult bolashaǵy úshin óte aýyr bolýy múmkin. Sondyqtan men árbir azamat zań men tártipti saqtaýy kerek dep únemi aıtyp júrmin. Biz sózben de, ispen de qoǵamdy ortaq maqsatqa jumyldyrýǵa jáne jalpyulttyq birlikti nyǵaıta berýge tıispiz. Halqymyz azat el bolyp, myqty ári ádiletti memleket qurý týraly armanyn bereke-birliginiń arqasynda ǵasyrlar tezinen aman alyp shyǵyp, aqıqatqa aınaldyrdy. Búginde bizdiń memlekettiligimiz qarqyndy damyǵan egemen respýblıkanyń órkenıetti ári quqyqtyq sıpatyna ıe boldy.

Qasterli táýelsizdigimizdi qorǵap, jan-jaqty nyǵaıtý – bárimizdiń ortaq mindetimiz, qazirgi jáne bolashaq urpaq aldyndaǵy perzenttik paryzymyz. Biz Respýblıka kúniniń mán-mańyzyn, onyń myqty memleket jáne kózi ashyq, kókiregi oıaý ult qalyptastyrýǵa baǵyttalǵan aýqymdy ózgeristerdiń sımvoly retindegi tereń maǵynasyn jastarǵa túsindirýimiz kerek.

Respýblıka kúni halyqtyń bolashaqqa senimin nyǵaıtatyn erekshe meıram bolýy kerek. Patrıottyq, qaıyrymdylyq jáne volonterlik is-sharalardy kóptep uıymdastyrǵan jón. Egemendik kúni ultty uıystyratyn naǵyz eldiktiń meıramyna aınalýǵa tıis. ıAǵnı, osy qasterli merekede Otanǵa degen shynaıy súıispenshilikti dáripteýimiz kerek. Bul – barshamyzǵa ortaq is. Sondyqtan bárimiz bir el bolyp atsalysaıyq!

Qadirli qaýym!

Táýelsiz eldiń tabysyn arttyrýǵa azamattarymyz mańdaı terimen úles qosyp júr. Shyn máninde, tabandy eńbek zor tabysqa jetkizedi. Barlyq salany, ásirese, óndiristi bilikti mamandar damytady. Sondyqtan biz bir el bolyp qoǵamda eńbekqorlyqty dáripteımiz. Adal eńbek pen jaýapkershilik jańa qoǵamdyq etıkanyń ózegi bolýy kerek. «Eńbegine qaraı – qurmeti» degen.

Eńbegimen daralanyp, kópshiliktiń qurmetine ıe bolǵan azamattyń biri – kórnekti memleket jáne qoǵam qaıratkeri Baqtyqoja Іzmuhambetov. Ol munaı-gaz salasynda, óndiriste jáne memlekettik qyzmette uzaq jyl boıy tabysty jumys istedi. Onyń ómir joly óskeleń urpaqqa ónege bolary sózsiz. Búgin men elimizge orasan zor eńbek sińirgen qaıratker Baqtyqoja Salahatdınulyna «Qazaqstannyń Eńbek Eri» ataǵyn berý týraly sheshim qabyldadym.

Basqa da salada, sonyń ishinde aýyl sharýashylyǵynda ónimdi eńbek etip júrgen azamattar az emes. Osyndaı naǵyz eńbek adamynyń biri – Syr eliniń azamaty Imamzada Shaǵyrtaev. Onyń aýyly da, sharýasy da kópshilikke úlgi bolyp otyr. Tabysqa jetken árbir jan óz aýylyna dál osylaı qamqor bolsa, nur ústine nur bolar edi. Aımaqty damytýǵa orasan zor úles qosqan Imamzada Qýanyshbaıuly búgin «Qazaqstannyń Eńbek Eri» ataǵyna ıe boldy.

Men eńbek adamyna erekshe qurmet kórsetilýi kerek dep udaıy aıtyp júrmin. Bıyl Joldaýymdy jarııalaǵan kezde Parlamentke eńbek adamdaryn arnaıy shaqyrdym. Olardyń qatarynda ustazdar da boldy. Qazir – bilimniń dáýiri. Bilimi ozyq jurt damý kóshiniń aldyna shyǵady. Bul zamanda bilimpazdyq eń basty qasıettiń birine aınalýǵa tıis. Sondyqtan bilim salasyn damytýǵa basa mán beremiz.

Muǵalimniń mártebesin kóterip, jaǵdaıyn jaqsartý óte mańyzdy. Astanada ótken Ustazdar sezinde bul máselege arnaıy toqtaldym. Óıtkeni ustazdar qaýymy ulttyń jańa sapasyn qalyptastyrady. Muǵalim bolyp, urpaq tárbıeleý – qasıetti mıssııa. Elimizde myńdaǵan adam osy mindetin adal atqaryp júr. Olar kúndelikti eńbegimen Qazaqstandy damytýǵa zor úles qosýda. Sol sebepti muǵalimderdiń qoǵamdaǵy orny erekshe bolýǵa tıis. Ustazǵa barlyq jerde qurmet kórsetilýi kerek.

Birneshe jyl buryn meniń tapsyrmammen «Qazaqstannyń eńbek sińirgen ustazy» ataǵy belgilendi. Jaqynda bir top pedagogti ózim arnaıy marapattadym. Osy ıgi úrdis búgin de jalǵasyn tappaq.

Semeı qalasyndaǵy №7 mektep-lıtseıdiń matematıka páni muǵalimi Alma Shúkejanova elý jyl boıy urpaqqa bilim men tárbıeni qatar berip keledi. Búgin Alma Saıdahmetqyzyn «Qazaqstannyń Eńbek Eri» ataǵymen marapattaý týraly sheshim qabyldadym.

Sondaı-aq búgin basqa da birqatar muǵalim joǵary memlekettik marapatqa ıe boldy. Osy arqyly men barsha ustazdar qaýymyna erekshe iltıpatymdy bildiremin.

Ulttyń rýhanııatyn damytyp, rýhyn kóterýge qalamgerlerimiz erekshe yqpal etedi. Buǵan deıin «Qazaqstannyń Halyq jazýshysy» ataǵyn qaıtarý týraly bastama kóterildi. Men Túrkistanda ótken Ulttyq Quryltaıdyń otyrysynda osy usynysqa qoldaý bildirdim.

Qurmetti ataq shırek ǵasyrdan soń jazýshylarymyzǵa qaıta berile bastady. Tól ádebıetimizdi damytýǵa zor úles qosqan bir top kórnekti qalamger búgin «Qazaqstannyń Halyq jazýshysy» atandy.

Meniń tapsyrmammen «Qazaqstannyń Halyq ártisi» ataǵy da qaıtaryldy. Bul ataq burynǵydaı teatr, kıno, mýzyka jáne taǵy basqa óner salasynyń elimizge tanymal tarlandaryna beriledi.

Men kóktemde ótken Qazaqstan halqy Assambleıasynyń HHHІІ sessııasynda el birligin jáne qoǵamdyq kelisimdi nyǵaıtýǵa kóp jylǵy qajyrly eńbegimen úles qosqan azamattardy arnaýly ordenmen marapattaý týraly tapsyrma berdim. Tıisti zańdarǵa ózgerister engizilgen soń, «El birligi» ordeni bekitildi. Nagradalar qatarynan laıyqty oryn alǵan bul marapat búgin alǵash ret tapsyrylady.

Memleket elimizdiń ǵylym salasyn damytýǵa, ǵalymdarymyzdyń jetistikteri men eńbegin baǵalaýǵa aıryqsha mán beredi. Bıyl ál-Farabı atyndaǵy ǵylym men tehnıka salasyndaǵy memlekettik syılyq Qazaqstannyń Ulttyq ıadrolyq ortalyǵynyń ǵalymdar ujymyna berildi. Ortalyq atom-energetıkasy salasynda teńdessiz zertteýler júrgizip, álemdik deńgeıdegi ozyq ázirlemeler jasady.

Qaýip-qaterden qaımyqpaı, ózgeniń ómirin qutqarý – naǵyz erlik. Mundaı adamdar shynaıy qurmetke laıyq. Búgin osyndaı birneshe azamatty marapattaımyn.

Jalpy, elimizdiń damýyna ár aımaqtyń turǵyndary, ár salanyń mamandary zor úles qosyp júr. Biz olarǵa árdaıym qurmet kórsetemiz.

Memlekettik marapatty, eń aldymen, halyqtyń alǵysy dep túsingen jón. Shyn máninde, týǵan eldiń yqylasynan artyq eshteńe joq. Endeshe, jurttyń rızashylyǵyn alyp, tabysty eńbek ete berińizder!

Qasterli Otanymyz órkendeı bersin!

Respýblıka kúni qutty bolsyn!