Qasym-Jomart Toqaevtyń qatysýymen ustazdardyń tamyz konferentsııasy bastaldy
ASTANA. KAZINFORM – Elordadaǵy Táýelsizdik saraıynda Memleket basshysy Qasym-Jomart Toqaevtyń qatysýymen ustazdardyń respýblıkalyq tamyz konferentsııasy bastaldy.
Jańa oqý jylynyń bastalýyna oraı zaman talabyna saı adamgershiligi joǵary, kásibı quzyretti jáne áleýmettik jaýapty tulǵany qalyptastyrýǵa baǵyttalǵan bilim berý júıesiniń búgini men bolashaǵyna baǵdar berý maqsatyndaǵy respýblıkalyq is-shara “Bilim keleshegi: adal azamat, kásibı maman” taqyrybymen ótip jatyr.
Konferentsııanyń negizgi baǵyttary mynalar:
- «Adal azamat» baǵdarlamasy aıasynda oqytý men tárbıeleýdiń ıntegratsııasy;
- tehnıkalyq jáne kásiptik bilim berý uıymdaryndaǵy kásibı baǵdar berý jáne bolashaq (hard, soft, digital) daǵdylardy qalyptastyrý;
- ádep, qaýipsizdik jáne sapany eskere otyryp, orta bilim berýge jasandy ıntellektini engizý;
- «Qazaqstan balalary» strategııasyn júzege asyrýda múddeli organdardyń ózara is-qımylyn damytý;
- mektepterde ınklıýzıvtik bilim berý tájirıbesin jetildirý.
1 500-den astam adam qatysyp jatqan is-shara aıasynda «Keleshek mektepteri», «Abaı ulttyq mektebi», «Daryndy balalar – el maqtanyshy», «TjKBB-degi úzdik tájirıbeler», «Bilim berýdegi tsıfrlyq sheshimder» taqyryptyq kórme aımaqtary uıymdastyrylǵan. Munda jasandy ıntellekt pen tsıfrlyq tehnologııalardy bilim berý júıesine engizýge arnalǵan aýqymdy ekspozıtsııa, onyń ishinde tsıfrlyq quraldar, ınteraktıvti platformalar, ádistemelik ázirlemeler men ıkemdi ári tıimdi oqý úderisin uıymdastyrýdyń jańa tásilderin tanystyratyn tehnologııalar usynylady.
Konferentsııa qorytyndysy boıynsha pedagog mártebesin arttyrýǵa baǵyttalǵan qarar qabyldanady. Saltanatty bólimde bilim berý salasynyń úzdik qyzmetkerlerin marapattaý rásimi jáne qazaqstandyq ártisterdiń qatysýymen kontsert ótetindigi josparlanǵan.
Esterińizge sala keteıik, 1 qyrkúıekten bastap elimizdiń barlyq bilim berý uıymynda «Adal azamat» birtutas tárbıe baǵdarlamasy iske qosylyp, tárbıe jumysy jańa formatqa kóshedi.
Al jyl sońyna deıin «Qazaqstan balalary» biryńǵaı baǵdarlamasy qabyldanady.