Qasym-Jomart Toqaevtyń dıplomatııalyq tájirıbesi mol – Soltústik Makedonııa Prezıdenti
ASTANA. KAZINFORM – Qazirgi álemdegi kúrdeli máselelerdi sheshý úshin dıplomatııanyń rólin kúsheıtip, bilikti mamandardyń pikirine qulaq túrý qajet. Bul týraly Soltústik Makedonııa Prezıdenti Gordana Sılıanovskaıa-Davkova Qazaqstan Prezıdenti jáne Túrkııa Premer-mınıstrimen ótken kezdesýden keıin málimdedi.
Soltústik Makedonııa Prezıdentiniń aıtýynsha, bolashaq ózdiginen kelmeıdi, oǵan qazirden bastap daıyndalý kerek. Ol bul rette dıplomatııanyń tek ǵylym emes, ómir súrý salty ekenin atap ótti.
Sonymen qatar Sılıanovskaıa-Davkova Qazaqstan Prezıdenti Qasym-Jomart Toqaevtyń halyqaralyq arenadaǵy, ásirese BUU aıasyndaǵy eńbegine joǵary baǵa berdi.
– Men Prezıdent Toqaevtyń dıplomatııa salasyndaǵy tájirıbesi óte baı ekenin bilemin. Ol ómiriniń kóp bóligin BUU-da beıbitshilik ornatý jolyndaǵy kúreske arnady. Bizde bilikti dıplomattar kóp, biraq qazir olardyń pikirin eshkim suramaıdy. Sondyqtan biz dıplomatııanyń kúshin qaıta jańǵyrtyp, bolashaqty qurý úshin mamandardyń kómegine júginýimiz kerek, – dedi Gordana Sılıanovskaıa-Davkova.
Aıta keteıik, buǵan deıin Memleket basshysy Qasym-Jomart Toqaevtyń Antalııa dıplomatııalyq forýmynyń paneldik sessııasyna qatysý úshin NEST kongress ortalyǵyna barǵanyn jazǵan edik.
