Qasym-Jomart Toqaevtyń Bakýge jumys sapary aıaqtaldy
Aqordanyń baspasóz qyzmeti Prezıdent Qasym-Jomart Toqaevtyń Ázerbaıjanǵa jumys sapary aıaqtalǵanyn málim etti, dep habarlaıdy Kazinform.
Memleket basshysy BUU-nyń Ortalyq Azııa elderi ekonomıkalaryna arnalǵan baǵdarlamasynyń (SPEKA) sammıtine qatysý úshin búgin Bakýge jumys saparymen barǵan bolatyn.
Ilham Álıev Qasym-Jomart Toqaevty Gıandjlık rezıdentsııasynda qarsy aldy.
Keıin qos prezıdent kelissóz júrgizdi. Kezdesý barysynda I.Álıev Qazaqstan prezıdentin kelesi jyly Ázerbaıjanǵa memlekettik saparmen kelýge shaqyrdy.
Odan ári Prezıdent Qasym-Jomart Toqaev SPEKA baǵdarlamasyna qatysýshy memleketter basshylarynyń birinshi sammıtine qatysý úshin Geıdar Álıev ortalyǵyna bardy.
Sammıtte sóılegen sózinde Memleket basshysy Qazaqstan 1997 jyly BUU-nyń Ortalyq Azııa ekonomıkalaryna arnalǵan Arnaıy baǵdarlamasyn qurýǵa bastamashy bolǵanyn eske saldy.
«Qazirgi ýaqytta bul baǵdarlamanyń óńirlik yntymaqtastyqty keńeıtý jáne jahandyq ekonomıkalyq protsesterge qosylý turǵysynan tıimdi platformaǵa aınalǵanyn erekshe atap ótkim keledi. Arnaıy baǵdarlamanyń 25 jyldyǵyna oraı uıymdastyrylyp otyrǵandyqtan, búgingi kezdesýimizdiń sımvoldyq máni zor», – dedi Qasym-Jomart Toqaev.
Sondaı-aq Memleket basshysy Qazaqstan SPEKA elderine jalpy somasy 2,3 mıllıard dollar bolatyn 175 shıkizattyq emes taýar túriniń eksportyn ulǵaıtýǵa daıyn ekenin aıtty.
Budan bólek, elimizde aldaǵy úsh jylda 1300 km astam temirjol salý josparlanǵanyn, Aral qasiretiniń saldaryn Ortalyq Azııa elderi ǵana emes, odan tysqary jerler de sezinip otyrǵanyn atap ótti.
Q.Toqaev kelesi jyly elimizde SPEKA-nyń paneldik sessııasyn uıymdastyrýdy usyndy.
Aıta keteıik, sammıt barysynda Ázerbaıjan Prezıdenti Ilham Álıev, Qyrǵyzstan Prezıdenti Sadyr Japarov, Tájikstan Prezıdenti Emomalı Rahmon, Ózbekstan Prezıdenti Shavkat Mırzıeev, Grýzııa Premer-mınıstri Iraklıı Garıbashvılı, Majarstan Premer-mınıstri Vıktor Orban, Túrikmenstan Mınıstrler kabıneti tóraǵasynyń orynbasary Hodjamýrad Geldymýradov, BUU Eýropalyq ekonomıkalyq komıssııasynyń Atqarýshy hatshysy Tatıana Molchan, Azııa jáne Tynyq muhıty óńirlerine arnalǵan Ekonomıkalyq jáne áleýmettik komıssııasynyń Atqarýshy hatshysy (ESKATO) Armıda Salsııa Alıshahbana, sondaı-aq Shyǵanaqtaǵy arab memleketteri yntymaqtastyq keńesiniń Bas hatshysy Djasem Ál-Býdaıvı sóz sóıledi.
