Ǵylymǵa tartylǵan jeke ınvestıtsııa 20 mlrd teńgeden asty – Saıasat Nurbek
ASTANA. KAZINFORM – Qazaqstanda ǵylymǵa tartylǵan jeke ınvestıtsııalar kólemi 20 mlrd teńgeden asty. Bul týraly QR Ǵylym jáne joǵary bilim mınıstri Saıasat Nurbektiń vedomstvonyń bıylǵy atqarǵan jumysy týraly derekterinen málim boldy.
- Biz úshin eń basty qundylyq – ǵylym salasyndaǵy adam. Bıyl Memleket basshysynyń tapsyrmasymen 576 jas ǵalymǵa turǵyn úı kiltteri tabystaldy. Bilim berý granttary keńeıip, olardyń sany 93 myńǵa jetti. Shákirtaqylar ósip, jańa stýdenttik jataqhanalar salynyp jatyr. Munyń bári – ǵylym men bilimge jasalǵan júıeli ári naqty qoldaý, - delingen mınıstrdiń habarlamasynda.
Sondaı-aq onda stýdentterdiń bıylǵy jetistikteri týraly baıandalady.
- Bizdiń stýdentter - erekshe maqtanyshymyz. 2025 jyly qazaqstandyq qurama halyqaralyq ýnıversıadada 23 medal jeńip aldy. Olardyń izdenisi, ıdeıasy men jigeri – durys baǵytta kele jatqanymyzdyń eń senimdi aıǵaǵy, - deıdi mınıstr.
Saıasat Nurbek 2025 jyl Qazaqstannyń ǵylymy men joǵary bilim júıesi úshin mazmundy da nátıjeli bolǵanyn aıtty. Qazirgi tańda 267 ǵylymı joba iske asyrý kezeńinde tur. Ǵylym men ekonomıkanyń arasy burynǵydan da jaqyndaı tústi. Jańa R&D ortalyqtary ashylyp, metallýrgııa men energetıkadan bastap, jańa materıaldar men bolashaq tehnologııalarǵa deıingi qoldanbaly ázirlemeler júzege asyrylyp jatyr. Birqatar ǵylymı sheshimderdiń áleýeti búginde ondaǵan mıllıard dollarmen baǵalanýy - qazaqstandyq ǵylymnyń múmkindigi men joǵarǵy dárejesiniń kórsetkishi. Bul jyl qazaqstandyq ǵylym básekege qabiletti ekenin, al ýnıversıtetter tek bilim beretin mekeme ǵana emes, el damýynyń zııatkerlik tiregine aınalǵanyn dáleldedi.
- QS World University Rankings 2026 reıtınginde elimizdiń 20 joǵary oqý ornynyń bolýy sonyń bir dáleli. Nazarbaev Ýnıversıtetiniń alǵash ret álemniń úzdik 500 ýnıversıtetiniń qataryna enýi – búkil joǵary bilim júıesi úshin mańyzdy meje. Halyqaralyq áriptestik te keńeıdi: 2025 jyly jetekshi sheteldik ýnıversıtetterdiń 9 fılıaly ashylyp, búginde Qazaqstanda 40 strategııalyq seriktestik jumys istep tur. Alda – 2026 jyl. Bizdi jańa mindetter, joǵary talaptar men úlken jaýapkershilik kútip tur. Biz árbir azamatqa múmkindik beretin, ashyq, ádiletti ári zamanaýı ǵylym men bilim júıesin qalyptastyrýdy jalǵastyramyz. Bul – el bolashaǵyna salynǵan eń mańyzdy ınvestıtsııa,-dedi mınıstr.
Osyǵan deıin mınıstr sheteldik stýdentterdiń Qazaqstanǵa 30 mlrd tg tabys ákelgeni týraly aıtqan edi.