Qasym-Jomart Toqaevtyń AQSh-qa sapary álemdik BAQ nazaryna ilikti
ASTANA. KAZINFORM — Qazaqstan Prezıdenti Qasym-Jomart Toqaevtyń Vashıngtonǵa sapary men Donald Tramppen kezdesýi álemdegi jetekshi buqaralyq aqparat quraldarynyń jańalyqtar kún tártibindegi basty oqıǵalardyń birine aınaldy.
Axios basylymy Qazaqstannyń Ibrahım kelisimine qosylǵany jaıynda jazyp, atalǵan klýbqa kóptegen eldiń múshe bolýǵa tyrysatyndyǵyna nazar aýdartady.
— Bul Gazadaǵy soǵys paraǵyn aýdaryp, óńirdegi úlken beıbitshilik pen yntymaqtastyqqa qaraı ilgerileýdiń qadamyna aınalady, — delingen sheteldik BAQ betinde jarııalanǵan materıalda.
AQSh-tyń eń bedeldi gazetteriniń biri The Washington Post-ta Qazaqstannyń Ibrahım kelisimine qosylýyn nazarynan tys qaldyrǵan joq.
Al Associated Press AQSh Prezıdenti Donald Tramptyń Qazaqstannyń atalǵan kelisimge qosylýyn «búkil álemde kópir ornatýdaǵy mańyzdy qadam» dep baǵalaǵan sózin keltiredi.
AQSh-ta jańalyq taratý jelisi boıynsha iri úshtikke kiretin CBS News Qazaqstannyń Ibrahım kelisimine qosylýynyń mańyzdylyǵyn atap ótedi. Basylymnyń jazýynsha, bul sheshim olardyń ekijaqty saýda-sattyǵy men yntymaqtastyǵyn nyǵaıta túsedi.
EE News by Politico basylymy Astana men Vashıngton arasyndaǵy paıdaly qazbalardy óndirý jónindegi mámilege jan-jaqty toqtalyp, Qazaqstannyń ýran óndirýde álemdegi eń iri memleketterdiń biri ekenine, sırek kezdesetin elementterdiń ken oryndaryn ıelik etetindigine basa nazar aýdartty.
France 24 halyqaralyq jańalyqtar arnasynyń habarlaýynsha, Qazaqstannyń Ibrahım kelisimine qosylýy Izraıl men musylman elderiniń basym bóliginiń arasyndaǵy qarym-qatynasty turaqtandyrý aıasyn keńeıte túsedi.
AZERTADJ Qazaqstan Prezıdentiniń Aq úı qojaıynymen kezdesýi barysynda Qazaqstan Respýblıkasynyń amerıkalyq kóshbasshynyń bitimgerlik bastamalaryn qoldaıtyndyǵyn málimdegenine mán beredi. Sondaı-aq agenttik Qasym-Jomart Toqaev «Tramptyń halyqaralyq beıbitshilik jáne órkendeý baǵytyn» (TRIPP, Zangezýr dálizi) qoldaǵanyn, atalǵan baǵyttyń Orta dálizdi odan ary damytýǵa septigin tıgize alatyndyǵyn, óz kezeginde Donald Tramp AQSh-tyń Qazaqstanmen jan-jaqty keńeıtilgen strategııalyq seriktestiktiń odan ary nyǵaıtýǵa nıetti ekenin rastaǵanyn jazdy.
Anadolu Ajansi basylymynyń jazýynsha, Qazaqstan BUU jarǵysynyń qaǵıdattary negizinde teketiresti eńserýge jáne dıalogty ilgeriletýge óz úlesin qosýǵa umtylady.
Túrkııanyń iri memlekettik aqparat agenttigi Qazaqstannyń Ibrahım kelisimi arqyly Taıaý Shyǵystaǵy beıbitshilik pen dıalogqa járdemdesýge daıyn ekendigin de atap ótedi.
Buǵan deıin AQSh Prezıdenti Donald Tramp Qazaqstannyń Ibrahım kelisimine qosylýyn álem elderi arasynda altyn kópir ornatýdaǵy mańyzdy qadam dep baǵalaǵanyn jazǵan edik.