Qasym-Jomart Toqaevqa Ózbekstannyń eń joǵary memlekettik nagradasy tabystaldy
TAShKENT. KAZINFORM — Prezıdent Shavkat Mırzıeev Memleket basshysyn «Olıı Darajalı Dýstlık» («Joǵary dárejeli dostyq») ordenimen marapattady. Bul týraly Aqordanyń baspasóz qyzmeti habarlady.
Qasym-Jomart Toqaev bul marapatty jeke ózine ǵana emes, tutas Qazaqstan halqyna kórsetilgen sheksiz qurmettiń belgisi retinde qabyl alǵanyn atap ótti.
Sonymen qatar ózbek kóshbasshysynyń eki el arasyndaǵy dostyq pen tatý kórshilik baılanysty nyǵaıtýǵa qosqan úlesin aıryqsha baǵalaıtynyn jetkizdi.
— Bul joǵary nagrada dostyq, beıbitshilik jáne qurmet sekildi qazaqstandyqtardyń janyna jaqyn qundylyqtardy ári sonymen úndes ózbek halqynyń rýhyn aıshyqtaıdy. Ordenniń ataýy elderimiz arasyndaǵy qarym-qatynastyń mazmunyn dálme-dál sıpattaıdy. Qazaqstan men Ózbekstannyń dostyǵy — baǵa jetpes baılyǵymyz. Biz ony kózimizdiń qarashyǵyndaı saqtap, baýyrlas halyqtardyń ıgiligi úshin órkendetemiz. Birlesken qajyr-qaırattyń arqasynda qazaq-ózbek strategııalyq seriktestigi men odaqtastyǵyn udaıy jańa mazmunmen baıyta beremiz dep senemin. Uly Abaı men Naýaı dostyqtyń ozyq úlgisin dáriptep, ózara senim halyqtardyń tatýlyǵyn nyǵaıtatynyn, bir-birine qurmet ony shyńdaı túsetinin nasıhat etti. Osy ósıetke súıenip, biz Ózbekstanmen baýyrlastyq odaqty nyǵaıtýǵa basa mán beremiz, — dedi Memleket basshysy.
Ózbekstan Prezıdenti Qazaqstannyń áleýmettik-ekonomıkalyq damýdaǵy jetistikteri men eldiń halyqaralyq arenadaǵy tabystary Qasym-Jomart Toqaevtyń esimimen tikeleı baılanysty ekenine toqtaldy.
— Osyndaı saltanatty rásimde Sizge, elimizdiń shyn janashyryna Ózbekstannyń joǵary memlekettik nagradasy — joǵary dárejeli «Dýstlık» ordenin tabystaý men úshin úlken mártebe. Bul — kópultty Ózbekstan halqynyń Qazaqstan Respýblıkasy Prezıdentiniń eren eńbegine kórsetken qurmeti men shynaıy baǵasy. Bizdiń elimiz Sizdi búkil álem biletin kórnekti memleket jáne saıası qaıratker retinde jaqsy tanıdy. Sizdiń parasatty basshylyǵyńyzben Ádiletti Qazaqstandy qurýǵa baǵyttalǵan aýqymdy reformalar júrgizilip jatyr. Barlyq salada jarqyn jetistikter bar. Qazaqstandyqtardyń ál-aýqaty turaqty túrde artyp keledi. Eń bastysy, halqyńyzdyń erteńge degen senimi zor. Biz jaqyn dos ári kórshi retinde Qazaqstannyń tabystaryna shyn júrekten qýanamyz, — dedi Shavkat Mırzıeev.
Aıta ketelik Qazaqstan men Ózbekstan prezıdentteri birlesken jobalardy iske qosý rásimine qatysty.