Qasym-Jomart Toqaevqa Iordanııanyń eń joǵary memlekettik nagradasy berildi
ASTANA. KAZINFORM — Iordanııa Koroli ІІ Abdalla ben ál-Hýseın Prezıdent Qasym-Jomart Toqaevty Iordan Hashımıt Koroldiginiń joǵary memlekettik nagradasy — al-Hussain ibn Ali ordenimen marapattady.
— Men úshin Iordan Hashımıt Koroldiginiń joǵary nagradasyna ıe bolý — zor mártebe. Bul orden Sizdiń tekti áýletińizdiń abyroıyn asyrǵan tulǵanyń esimimen atalady. Onyń ar-ojdany, senimi men nanymy, týǵan eline adal qyzmeti urpaqqa úlgi bolyp keledi. Osy joǵary nagradany eńbegimniń baǵalanýy ǵana emes, eń aldymen, halyqtarymyz arasyndaǵy berik dostyq pen ózara qurmettiń belgisi dep sanaımyn. Bul Qazaqstan men Iordanııa arasyndaǵy baılanystardyń tyǵyz ári dáıekti túrde nyǵaıyp kele jatqanyn aıǵaqtaıdy. Sizdiń ekijaqty yntymaqtastyqty odan ári ilgeriletý nıetińizdi joǵary baǵalaımyn, — dedi Memleket basshysy.
Al-Hussain ibn Ali ordenin 1949 jyly Iordanııa Koroli I Abdalla ben ál-Hýseın ákesi — Mekke sharıfi Hýseın ben Álıdiń (1853–1931 jj) qurmetine taǵaıyndaǵan. Ol Hashımıtter áýletiniń asa kórnekti ókilderiniń biri bolǵan.
Ordendi tabystaý Iordanııa Koroli tarapynan kórsetilgen aıryqsha qurmettiń belgisi ári joǵary deńgeıdegi saıası senimniń aıǵaǵy sanalady.
Buǵan deıin Memleket basshysy Qasym-Jomart Toqaev Iordanııa Korolin Al-Farabi ordenimen marapattaǵan edi.
Qasym-Jomart Toqaev Aqaba protsesin joǵary baǵalaıtynyn jáne aldaǵy sessııanyń jasandy ıntellekt salasyndaǵy qaýipsizdik taqyrybyna arnalatynyn da habarlady.
Búgin Prezıdent Qasym-Jomart Toqaevtyń shaqyrýymen Qazaqstanǵa Iordan Hashımıt Koroldiginiń Koroli II Abdalla ben ál-Hýseın resmı saparmen keldi. Astana áýejaıynda Iordanııa Korolin Memleket basshysynyń ózi kútip aldy.
Sondaı-aq Aqordada Qazaqstan Prezıdenti Qasym-Jomart Toqaev pen Iordanııa Koroli ІІ Abdalla ben ál-Hýseın kelissóz júrgizdi.
