Qasym-Jomart Toqaevqa ekonomıkadaǵy memlekettik úlesti azaıtý jospary tanystyryldy

ASTANA. KAZINFORM — Memleket basshysy Básekelestikti qorǵaý jáne damytý agenttiginiń tóraǵasy Marat Omarovty qabyldady, dep habarlaıdy Aqordanyń baspasóz qyzmeti.

Prezıdentke «Ekonomıkany yryqtandyrý jónindegi sharalar týraly» Jarlyqty iske asyrý maqsatynda atqarylǵan jumys nátıjesi baıandaldy.

Agenttik tóraǵasy memlekettiń ekonomıkadaǵy úlesin azaıtý úshin 450-den asa kásiporyndy qamtıtyn tizim daıyndalǵanyn jetkizdi. Ulttyq jekeshelendirý keńsesi ázirlegen tizimdegi kompanııalardy básekelestik ortaǵa berý usynylady.

Marat Omarovtyń aıtýynsha, negizgi taýarlar naryǵyndaǵy básekelestikti damytý jumystary aıasynda bırjalyq qyzmet zańnama talaptary men qazirgi naryqtyq saýda jaǵdaılaryna sáıkestendirilgen. Búgingi tańda 3 taýar bırjasy jumys isteıdi, al Agenttikke atalǵan saladaǵy memlekettik baqylaý fýnktsııalary berilgen sátte 22 bırja bolǵan edi.

Sondaı-aq Memleket basshysyna vedomstvonyń aldaǵy kezeńge arnalǵan jumys jospary tanystyryldy.

Kezdesý sońynda Prezıdent ekonomıkanyń basty sektorlaryndaǵy básekelestikti damytýǵa, vedomstvo júrgizip jatqan tergeýler men tekserýlerge, sondaı-aq shaǵyn jáne orta bıznesti qorǵaýǵa baılanysty birqatar tapsyrma berdi.

Osyǵan deıin Qasym-Jomart Toqaev «Beıbitshilik pen quqyqqa negizdelgen bolashaq» atty konstıtýtsııalyq sot tóreliginiń halyqaralyq forýmyna qatysýshylarmen kezdesken edi.