Qasym-Jomart Toqaev Japonııada turyp jatqan qazaqstandyqtarmen kezdesti

ASTANA. KAZINFORM – Prezıdent Qasym-Jomart Toqaev qazirgi ýaqytta Japonııada bilim alyp, túrli salada qyzmet etip júrgen Qazaqstan azamattarymen kezdesti, dep habarlaıdy Aqorda.

Memleket basshysy Japonııa sııaqty damyǵan eldiń tájirıbesin zerdeleý mańyzdy ekenin aıtty.

– Bul sapar eki el arasyndaǵy qarym-qatynasqa tyń serpin beredi dep oılaımyz. Japon tarapy da úlken mán berip otyr. Búgin Premer-mınıstrmen kezdesemin.

Yntymaqtastyǵymyzdyń keleshegi zor bolatynyna eshqandaı kúmán joq. Ózderińizge belgili, Qazaqstan óz damýynda jańa kezeńge qadam basty. Bıyl el ekonomıkasynyń ósimi 6 paıyzdan asty. Bul – óte jaqsy kórsetkish. Degenmen munymen toqtap qalýǵa bolmaıdy. Inflıatsııany tómendetý, ınfraqurylymdy jańartý qajet. Qazaqstan keleshekte tsıfrlyq elge aınalýy kerek. Aldymyzda osyndaı úlken maqsattar tur, – dedi Qasym-Jomart Toqaev.

Otandastarymyz arasynan Ritsumeikan Azııa – Tynyq muhıty ýnıversıtetiniń vıtse-prezıdenti, professor Serik Meıirmanov, ARIA Consulting negizin qalaýshy Araılym Hasan, Showa jáne Juntendo medıtsına ýnıversıtetteriniń dotsenti Ábdibek Qalıbek, Ailia kompanııasynda jasandy ıntellekt tehnologııasymen aınalysatyn ınjener Eldar Tóleýbaı sóz sóılep, ózderiniń Kúnshyǵys elindegi jetistikterimen bólisti.

Prezıdent Japonııada turyp jatqan qazaqstandyqtarǵa tabys tiledi.

Aıta keteıik, Qasym-Jomart Toqaev Meıdjı Djıngý ǵıbadathanasyn aralap kórdi.