Qasym-Jomart Toqaev jańadan taǵaıyndalǵan elshi Álibek Baqaevty qabyldady
ASTANA. KAZINFORM – Qasym-Jomart Toqaev Qazaqstannyń Ulybrıtanııa jáne Soltústik Irlandııa Birikken Koroldigindegi jańadan taǵaıyndalǵan elshisi Álibek Baqaevty qabyldady. Bul týraly Aqorda habarlady.
Áńgimelesý barysynda Prezıdent qazaq-brıtan kópjosparly yntymaqtastyǵyn odan ári damytýǵa qatysty negizgi mindetterdi aıqyndady.
Memleket basshysy Qazaqstan Respýblıkasy men Ulybrıtanııa jáne Soltústik Irlandııa Birikken Koroldigi arasyndaǵy Strategııalyq seriktestik jáne yntymaqtastyq týraly kelisimdi is júzinde tıimdi júzege asyrýǵa, saıası dıalogty jandandyrýǵa, saýda-ekonomıkalyq jáne ınvestıtsııalyq yqpaldastyqty keńeıtýge, sondaı-aq energetıka, kólik, ınnovatsııa jáne bilim salalaryndaǵy birlesken jobalardy ilgeriletýge kúsh-jiger jumyldyrýdy tapsyrdy.
Aıta keteıik, Memleket basshysy Qasym-Jomart Toqaev bıyl 22 shildede birqatar kadrlyq ózgerister týraly jarlyqqa qol qoıyp, birneshe eldegi elshini aýystyrdy.
