Qasym-Jomart Toqaev jańa turǵyn alaptardaǵy ataýsyz kóshelerdi retteýdi tapsyrdy

BÝRABAI. KAZINFORM – Jańa turǵyn alaptaryndaǵy kóshelerdiń ataýsyz bolýy túrli qyzmetterdiń jumysyn qıyndatyp jatyr. Ulttyq quryltaıdyń IV otyrysynda Prezıdent Qasym-Jomart Toqaev jergilikti ákimderge osy máseleni retteýdi tapsyrdy.

- Qazir eldi mekenderdiń aýmaǵy ulǵaıyp jatyr, qalalarda jańa aýdandar boı kóterýde. Osyǵan baılanysty ataýy qaıtalanatyn nemese múldem ataýy joq myńdaǵan kóshe paıda boldy. Bul jaǵdaı órt sóndirýshilerge, tártip saqshylaryna, jedel járdem men basqa da qurylymdarǵa qıyndyq týǵyzady. Eń aldymen osyndaı kóshelerdiń ataýyn retke keltirý qajet, - dedi Prezıdent. 

Qasym-Jomart Toqaev mekenjaı ataýlaryn ózgertýde jershildik pen tamyr-tanystyqqa jol joq ekenin eskertti. 

- Meniń bastamammen onomastıka salasyn retke keltirý úshin aýqymdy jumys bastaldy. Kósheler men eldi-mekenderge ataý berý nemese ataýlardy ózgertý máselesine kelgende jergilikti atqarýshy organdar kóp qatelik jibergen, bul rette tipti, jerlestik pen tamyr-tanystyqqa jol berilgen. Sondyqtan bul isti ortalyqtandyrý týraly sheshim qabyldandy.

Depýtattar bastamaǵa qoldaý bildirdi. Sonyń nátıjesinde bizde onomastıka salasyndaǵy jumystyń biryńǵaı ári naqty reglamenti bar.

Alaıda tıisti rásimderdi ózgertip qana qoımaı, sonymen birge, bul jumyspen tııanaqty aınalysý kerek. Tarıhı ádildik qaǵıdatyn qatań ustaný qajet, - dedi Prezıdent.

Aıta ketý kerek, quryltaıdyń paneldik sessııalary keshe bastalǵan. Ol sektsııalardyń taqyryptary azamattyq qoǵam, mádenıet, óner, rýhanııat, bilim jáne ǵylym, áleýmettik-ekonomıkalyq damý máselelerin qamtydy.