Qasym-Jomart Toqaev YTO Express Co., Ltd kompanııasynyń basqarma tóraǵasy Iý Hýeı Dzıaony qabyldady

Kezdesý barysynda elektrondy kommertsııa, kólik jáne logıstıka salalaryndaǵy ózara tıimdi yntymaqtastyq perspektıvalary talqylandy, dep habarlaıdy Kazinform Aqordanyń baspasóz qyzmetine silteme jasap.

Qasym-Jomart Toqaev elimizde Alibaba, Wildberries, OZON jáne JDcom sekildi iri marketpleıster jumys istep jatqanyn atap ótti. Qazaqstan 2030 jylǵa qaraı elektrondy saýda úlesin jalpy saýda-sattyq naryǵynyń 20 paıyzyna deıin jetkizýdi josparlap otyr.

Áńgimelesý barysynda Prezıdentke Qytaıdyń tez jetkizýge mamandanǵan eń iri logıstıkalyq operatorlarynyń biri bizdiń naryqqa kelip, Ortalyq Azııadaǵy bas keńsesin Qazaqstanda ashýdy kózdep otyrǵany jóninde málimet berildi. Bul ýaǵdalastyq «Qazposhta» aktsıonerlik qoǵamy men YTO Express Group arasyndaǵy yntymaqtastyq týraly kelisimge qol qoıý aıasynda bekitiledi.

– Qytaıdyń «Bir beldeý, bir jol» bastamasy aıasynda Sizdiń kompanııańyzben ózara tıimdi yntymaqtastyq ornatý úshin zor múmkindigimiz bar. Búginde elektrondy kommertsııa – ekonomıkanyń eń jyldam damyp kele jatqan salalarynyń biri. Álemdik JІÓ-niń shamamen 7 trıllıon dollar qarjysy osy saladan quralady. Qazaqstan elektrondy kommertsııany damytýǵa aıryqsha mán beredi, – dedi Qasym-Jomart Toqaev.

Iý Hýeı Dzıao Memleket basshysyna kompanııanyń Qazaqstandaǵy negizgi jobasy týraly baıandady. Atap aıtqanda, kásiporyn elimizdiń birqatar óńirinde «A» sanatyna jatatyn joǵarytehnologııalyq mýltımodaldy ortalyqtar salýdy josparlap otyr. Mundaı ınfraqurylym taýardy jedel óńdep, ony Eýropa Odaǵy, Eýrazııalyq ekonomıkalyq odaq jáne Ortalyq Azııa elderine shyǵarýǵa ońtaıly jaǵdaı jasaıdy. Al ıntellektýaldy IT-sheshimderdi engizý logıstıka protsesin tolyqtaı avtomattandyrýǵa múmkindik berip, elektrondy kommertsııa taýarlarynyń kedennen jyldam ótýin qamtamasyz etedi.