Toqaev: Xiaomi-diń el naryǵyndaǵy barlyq bastamasyn qoldaýǵa daıynbyz
ASTANA. KAZINFORM — Memleket basshysy Qasym-Jomart Toqaev Xiaomi korporatsııasynyń prezıdenti Lý Veıbınmen kezdesti.
Aqordanyń baspasóz qyzmetiniń habarlaýynsha, joǵary tehnologııalar salasynda álemdik kóshbasshylardyń biri sanalatyn kompanııanyń jetekshisimen áńgimelesý barysynda ózara tıimdi yntymaqtastyq perspektıvasy talqylandy.
Prezıdent Qasym-Jomart Toqaev Qazaqstannyń zamanaýı tsıfrlyq ekonomıka qalyptastyrýǵa, jasandy ıntellekt pen joǵary tehnologııalyq ónerkásipti damytýǵa basa mán berip otyrǵanyn aıtty.
Memleket basshysy óńirde Xiaomi brendine suranys arta túskenin atap ótti. Kompanııanyń ozyq tehnologııalardy ıgerýde tájirıbesi mol ekenin eskerip, jasandy ıntellektini, esepteýish qýatyn, «bultty» tehnologııalardy jáne tsıfrlyq platformalardy damytý baǵytynda birlesken jobalardy iske asyrý áleýetin zerdelep kórý usynyldy.
Lý Veıbın korporatsııanyń strategııalyq damý josparymen tanystyrdy.
Xiaomi basshylyǵy Qazaqstan men Ortalyq Azııa naryǵynda dıstrıbýtsııany barynsha retteýdi josparlap otyr. Sonymen qatar kúrdeli JI-júıelerge qyzmet kórsetý úshin jergilikti mamandardy daıarlaý máselesi de kún tártibinde tur.
Bul rette Prezıdent elimizdiń elektromobıl, akkýmýlıator óndirisin jolǵa qoıýǵa, sondaı-aq ıntellektýaldyq kólik júıelerin damytýǵa múddeli ekenin jetkizdi.
Memleket basshysy Xiaomi kompanııasynyń Qazaqstan naryǵynda qyzmet aıasyn keńeıtýge jáne uzaqmerzimdi strategııalyq seriktestikti nyǵaıtýǵa baǵyttalǵan barlyq bastamasyn qoldaýǵa daıyn ekenin rastady.
Eske salaıyq, buǵan deıin Qasym-Jomart Toqaevtyń Qytaıǵa sapary kezinde 70-ten astam kommertsııalyq kelisimge qol qoıylǵanyn habarlaǵanbyz.
