Qasym-Jomart Toqaev Máskeýge memlekettik saparmen bardy
MÁSKEÝ. KAZINFORM — Memleket basshysy Qasym-Jomart Toqaev Reseı Prezıdenti Vladımır Pýtınniń shaqyrýymen Máskeýge memlekettik saparmen bardy, dep habarlaıdy Aqordanyń baspasóz qyzmeti.
Vnýkovo-2 áýejaıynda mártebeli meımannyń kelýine oraı Máskeý garnızonynyń qurmet qaraýyly men áskerı úrmeli orkestri sap túzedi.
Aqordanyń baspasóz qyzmeti taratqan aqparatqa sáıkes Memleket basshysyn Reseı Federatsııasy Úkimeti Tóraǵasynyń birinshi orynbasary Denıs Mantýrov pen basqa da resmı tulǵalar qarsy aldy.
Eki eldiń memlekettik ánurandary shyrqaldy.
«Qazaqstan Respýblıkasynyń Prezıdenti, Joǵary mártebeli Qasym-Jomart Toqaev myrza, Reseı Federatsııasyna qosh keldińiz!» — Máskeý kóshelerinde Qazaqstan Prezıdentiniń qurmetine osyndaı jazýlary bar bılbordtar men LED-ekrandar ornalastyryldy.
Budan buryn habarlanǵandaı, memlekettik shekaradan ótken sátten Máskeý áýejaıyna qonǵanǵa deıin Reseıdiń áýe keńistiginde Qazaqstan Prezıdentiniń bortymen birge RF Qorǵanys mınıstrliginiń Sý-35 ushaqtary qaptaldasyp ushty.
Aıta keteıik, osyǵan deıin Prezıdent Qasym-Jomart Toqaev 11-12 qarashada Reseı Federatsııasyna memlekettik saparmen baratyny habarlandy. Memleket basshysy Prezıdent Vladımır Pýtınmen kelissózder júrgizedi.
Sapar aıasynda ekijaqty strategııalyq áriptestik pen odaqtastyqty damytý, saýda-ekonomıkalyq jáne mádenı-gýmanıtarlyq yntymaqtastyqty keńeıtý máseleleri talqylanady degen boljam bar. Kazinform analıtıkalyq sholýshysy sarapshylarmen birge yqtımal nátıjelerdi taldady.
Osyǵan deıin Peskov Qazaqstan Prezıdentiniń Máskeýge memlekettik saparyna daıyndyq barysyn baıandady.
Sondaı-aq Reseı Federatsııasyna memlekettik sapary qarsańynda «Rossııskaıa gazeta» basylymynda Qasym-Jomart Toqaevtyń «Vechnaıa drýjba – pýtevodnaıa zvezda dlıa nashıh narodov» atty maqalasy jaryq kórdi.