Qasym-Jomart Toqaev Vladımır Pýtındi Qazaqstan-Reseı shekarasy týraly shartqa 20 jyl tolýymen quttyqtady
ASTANA. KAZINFORM - Qasym-Jomart Toqaev Vladımır Pýtındi Qazaqstan-Reseı memlekettik shekarasy týraly sharttyń qabyldanǵanyna 20 jyl tolýymen quttyqtady. Bul týraly Aqorda habarlady.
Qasym-Jomart Toqaev 2005 jyly 18 qańtarda Máskeýde qol qoıylǵan Qazaqstan-Reseı memlekettik shekarasy týraly shartqa 20 jyl tolýyna oraı Reseı Federatsııasynyń Prezıdenti Vladımır Pýtınge quttyqtaý jedelhatyn joldady.
– Jalpyǵa birdeı halyqaralyq quqyq normalaryn basshylyqqa alǵan bul tarıhı qujat álemdegi eń uzyn qurlyq shekarasyn quqyqtyq turǵydan rásimdeýge berik negiz qalady jáne elderimizdiń myzǵymas dostyǵynyń, tatý kórshilik pen odaqtastyq qatynastarynyń sımvolyna aınaldy, – dep jazylǵan Qazaqstan Prezıdentiniń jedelhatynda.
Memleket basshysy kórshiles eki eldiń san qyrly yntymaqtastyǵy aldaǵy ýaqytta da damyp, bekı túsetinine senim bildirdi.
Reseı Prezıdenti Vladımır Pýtın Qazaqstanǵa memlekettik saparyn qorytyndylap, reseılik BAQ ókilderine suhbat bergen edi.