Qasym-Jomart Toqaev Vatıkanda Rım Papasy Frantsıskpen kezdesti
VATIKAN. KAZINFORM – Memleket basshysy Rım Papasynyń shaqyrýymen Qasıetti Taqqa alǵashqy resmı saparyn jasady.
Qazaqstan Prezıdenti sóziniń basynda álemdegi adamzattyń ıgiligi jolyndaǵy qajymas qaıraty men qajyrly kúsh-jigeri úshin Katolık shirkeýiniń Joǵarǵy Pontıfıkine rızashylyǵyn bildirdi.
– Sizdiń dúnıejúzi halqyna beıbitshilik tilegen duǵalaryńyz myńdaǵan katolıktiń ǵana emes, basqa dinderdi ustanatyn kóptegen otandastarymyzdyń júreginen oryn alyp, sanalaryna senim men úmit uıalatty. Búginde órkenıetter toǵysynda ornalasqan kópultty jáne kópkonfessııaly Qazaqstan Ortalyq Azııadaǵy eń iri katolık qaýymynyń óz úıine aınaldy, – dedi Prezıdent.
Memleket basshysynyń aıtýynsha, barlyq dinderdiń ókilderi Ádiletti Qazaqstandy qurýǵa eleýli úles qosýda.
– Biz «birligimiz áralýandyqta» qaǵıdatyna negizdelgen beıbitshilik pen ulttyq dıalogtyń ózimizge tán modelin qalyptastyra aldyq. Elimizde túrli dinniń ókilderi ózderiniń ǵıbadathanalarynda qulshylyq ete alady. Dinı senim bostandyǵy quqyǵyn qorǵaý – meniń saıası baǵdarymnyń ajyramas bóligi, – dedi Qasym-Jomart Toqaev.
Qazaqstan Prezıdenti Rım Papasy Frantsısktiń «Qalaǵa jáne álemge» atty dástúrli Joldaýyn eske sala otyryp, onyń «Beıbitshilik – eń aldymen Qudaıdyń syıy. Biraq bul – bárimizge júktelgen úlken jaýapkershilik» degen sózderin tolyq qoldaıtynyn jetkizdi.
– Sizdiń ustanymyńyzdy tolyǵymen quptaı otyryp, biz kóptegen aıyrmashylyqtarymyzǵa qaramastan, beıbitshilik ıdeıalaryn, mádenıetter men dinder arasyndaǵy turaqty dıalogty, ártúrli dindi ustanatyn adamdardyń ıgiligi jolyndaǵy damýdy ilgeriletý úshin barshamyzǵa birlik kerek ekenine senimdimin. Іzgi nıet bildirýge ýaqyt jetkilikti, kelissózder júrgizýge keńistik te bar, danalyq tanytýǵa áli de múmkindik mol, – dedi Memleket basshysy.
Qasym-Jomart Toqaev ekijaqty qatynastar aıasynda Qazaqstan shynaıy dostyqqa, kelisim men ózara qurmetke negizdelgen Qasıetti Taqpen aradaǵy burynnan kele jatqan seriktestik baılanystardy joǵary baǵalaıtynyn atap ótti.
Sondaı-aq belsendi saıası dıalog júrgizilip otyrǵanyn, quqyqtyq bazany retke keltirý, keńeıtý úshin dáıekti jumystar atqarylyp jatqanyn jetkizdi.
Qazaqstan Prezıdenti álemdegi teketirester men alaýyzdyq oshaqtaryn toqtatýǵa baǵyttalǵan belsendi kúsh-jigeri úshin Rım Papasy Frantsıskke rızashylyǵyn bildirdi.
– Shyn máninde, qazirgi geosaıası turaqsyzdyq búkil jahandyq qaýipsizdik arhıtektýrasyna nuqsan keltirýde, sondaı-aq halyqtardy úlken qaıǵy-qasiretke ushyratyp, ekonomıkalyq qıyndyqtar týdyryp otyr. Qazaqstan izgilikti jaqtaıtyn memleket retinde jahandyq beıbitshilik pen qaýipsizdikti qoldaýǵa is júzinde eleýli úles qosýda. Biz álemniń túrli qaqtyǵys oshaqtaryndaǵy BUU-nyń bitimgershilik mıssııalaryna atsalysamyz, – dedi Qasym-Jomart Toqaev.
Óz kezeginde Pontıfık beıbitshilik pen kelisimdi qamtamasyz etý isindegi kúsh-jigeri úshin Qazaqstan Prezıdentine alǵys aıtty.
Kezdesý sońynda Memleket basshysy mazmundy kezdesý úshin Rım Papasyna alǵys aıtyp, Qazaqstan aldaǵy ýaqytta toleranttylyq, úılesimdilik, baýyrlastyq ıdeıalaryn dáripteý isinde Qasıetti Taqpen yntymaqtastyq jasaýǵa nıetti ekenin rastady.
Aıta keteıik, buǵan deıin Prezıdenttiń Rım Papasy Frantsıskpen kezdesý úshin Vatıkanǵa barǵanyn jazǵan bolatynbyz.
Sodan soń eki el arasyndaǵy yntymaqtastyqtyń negizgi sátterine sholý usynǵanbyz.
