Qasym-Jomart Toqaev Úkimettiń aldyndaǵy negizgi mindetti atady

ASTANA. KAZINFORM — Damýshy elderge salynatyn jahandyq ınvestıtsııa kólemi azaıyp barady. Bul týraly Úkimettiń keńeıtilgen otyrysynda Memleket basshysy Qasym-Jomart Toqaev aıtty.

— Bizdiń basty maqsatymyz — qazirgi kúrdeli kezeńde Qazaqstannyń áleýmettik-ekonomıkalyq jáne halyqaralyq áleýetin arttyrý. Sarapshylar álem ekonomıkasynyń ósimi baıaýlap, halyqaralyq saýda qarqyny álsireıdi degen boljam jasaýda. Damýshy elderge salynatyn jahandyq ınvestıtsııa kólemi azaıyp barady. Qarjy salasy toqyraýǵa ushyraýy múmkin. Búginde kóptegen el óz naryǵyn qorǵaý sharalaryn kúsheıtip jatyr. Memleketter arasynda ózara tarıftik shekteý qoıý úrdisi beleń aldy. Jahandaný úderisi keri sıpat ala bastady, — dedi Memleket basshysy.

Prezıdenttiń paıymynsha, munyń bári álemdegi geosaıası ahýaldy ózgertip jatyr.

— Biraq negizgi ári sheshýshi oqıǵalar áli alda. Dúnıe júzinde múlde jańa úderister paıda bolýda. Memlekettiń turaqty damýy úshin biz osy ózgeristerge ekonomıkalyq jáne saıası turǵydan beıimdelýimiz qajet. Bul — asa mańyzdy mindettiń biri. Burynǵy tásilder qazir tıimsiz bolyp qalǵanyn kórip otyrmyz. Ozyq memleketter álem ekonomıkasyn damytýdyń jańa úlgisin ázirleýge kirisip ketti. Biz de bul úderisten shet qalmaýymyz kerek, — dedi Qasym-Jomart Toqaev.

Memleket basshysynyń aıtýynsha, ult múddesin qorǵaý úshin ekonomıkany nyǵaıtýǵa jáne damytýǵa arnalǵan naqty jospar bolýy tıis.

— Dúnıe júzindegi ekonomıkalyq ahýalǵa qaramastan, byltyr ekonomıkamyz 6,5 paıyzǵa ósti. Bizdiń mıssııamyz — aıqyn: ekonomıkalyq ósim joǵary sapaǵa ıe bolýy kerek, ıaǵnı, eń aldymen, halyqtyń ál-aýqatyn arttyryp, turmysyn jaqsartýǵa tıis. Basqasha aıtsaq, ishki jalpy ónim artqan saıyn azamattardyń naqty tabysy da kóbeıýi kerek. Bul — Úkimettiń aldynda turǵan negizgi mindet, — dedi Prezıdent.

Keńeıtilgen otyrys barysynda Prezıdent qoǵamnyń saıası mádenıeti jáne belsendiligi artyp kele jatqanyn aıtty.