Úkimetke jasandy ıntellektige mamandanǵan data-ortalyqtardyń qurylysyn júrgizý tapsyryldy
2024 jyly Ulttyq jasandy ıntellekt platformasyn iske qosqan durys. Bul týraly «Digital Bridge 2023» halyqaralyq tehnologııalyq forýmynda Memleket basshysy Qasym-Jomart Toqaev aıtty, dep habarlaıdy Kazinform.
«Tsıfrlyq ınfraqurylymdy júıeli túrde damytý mańyzdy. Ozyq IT-ınfraqurylym tsıfrlyq ındýstrııadaǵy keleshek progreske, atap aıtqanda jasandy ıntellektiniń damýyna negiz qalaıdy. Sondyqtan ınfraqurylymdy damytqan kezde IT-ónim ázirleýshilerdiń qajettiligi árdaıym aldyn ala eskerilýge tıis. Eń aldymen, biz esepteýish ortalyqtardyń qýatyn arttyrýymyz qajet. Úkimetke eki jyl ishinde jasandy ıntellektige mamandanǵan data-ortalyqtardyń qurylysyn júrgizýdi tapsyramyn». – dedi Prezıdent.
Memleket basshysy bul iske Amazon, Google, Mastercard jáne Citigroup sııaqty álemge tanymal kompanııalardy tartýǵa bolatyndyǵyn aıtty.
«Jaqynda Nıý-Iork qalasyna jasaǵan saparymda atalǵan kompanııalardyń basshylarymen kezdestim. Tıisti ýaǵdalastyqtarǵa qol jetkizdik. Sonymen qatar jasandy ıntellektige arnalǵan derekter ekojúıesin damytý mańyzdy. Shyn máninde, jasandy ıntellektiniń «qoregi», qozǵaýshy kúshi – úlken derekter qory. Qazaqstanda osy salada túrli sheshimder júzege asyryldy. Alaıda memlekettik organdarda jınaqtalǵan ushy-qıyrsyz derekter qoryna qoljetimdilik shekteýli bolýyna baılanysty onyń áleýeti áli tolyq paıdalanylmaı otyr. Bul jerde aqparattyń «ashyqtyq prezýmptsııasyn» basshylyqqa alý kerek», - dedi Qasym-Jomart Toqaev.
Prezıdent Smart Data Ukimet arqyly anonımdi derekterge erkin qol jetkizýdi qamtamasyz etý qajettin atap ótti.
«Men bul jerde barlyq aqparattyń anonımdi bolǵany ári senimdi qorǵalǵany jón ekenin aıtyp otyrmyn. Jeke derekterdiń taralyp ketýine qatysty barlyq qaýipti joıý kerek. Sonymen qatar kelesi jyly Ulttyq jasandy ıntellekt platformasyn iske qosqan durys. Bul bastama memleket pen iri bıznes derekterin biriktirip, olardyń ózektiligi men qoljetimdigin qamtamasyz etýge tıis», - dedi Memleket basshysy.
