Qasym-Jomart Toqaev Túrikmenstan Prezıdentin Aqordada qarsy aldy
ASTANA. KAZINFORM — Aqordada Memleket basshysy Qasym-Jomart Toqaev elimizge memlekettik saparmen kelgen Túrikmenstan Prezıdenti Serdar Berdimuhamedovti qarsy aldy.
Aldymen Qasym-Jomart Toqaev pen Serdar Berdimuhamedov bir-birine resmı delegatsııa múshelerin tanystyrdy.
Osydan keıin mártebeli meımannyń saparyna oraı saltanatty rásimder zalynda sap túzegen qurmet qaraýylynyń bastyǵy Memleket basshylaryna sálemdik baıanat berdi. Prezıdent orkestri eki eldiń memlekettik Ánuranyn oryndady.
Ánurandardy tyńdap bolǵannan keıin Qasym-Jomart Toqaev pen Túrikmenstan Prezıdenti kilemshe boıymen Qazaqstan Respýblıkasynyń Memlekettik Týyna qaraı júrdi.
Onyń aldyna kelgende meıman toqtap, basyn sál ıip, óziniń qurmetin bildirdi. Sonan soń Memleket basshylary qurmetti qaraýyl sapynyń boıymen júrdi. Qurmetti qaraýyl bastyǵymen qoshtasty.
Qazirgi ýaqytta joǵary deńgeıde kelissózder bastaldy. Onyń barysynda taraptar Qazaqstan men Túrikmenstan arasyndaǵy strategııalyq seriktestikti nyǵaıtý perspektıvasyn talqylaıdy.
Aıta keteıik, Qasym-Jomart Toqaev keshe Qazaqstanǵa memlekettik saparmen kelgen Túrikmenstan Prezıdenti Serdar Berdimuhamedovti elorda áýejaıynda qarsy aldy.